സിംഗിള്‍സില്‍ പുറത്തായെങ്കിലും ദുബായ് ഓപ്പണ് ടൂര്‍ണ്ണമെന്‍റിലെ ഡബിള്‍സില്‍ സാനിയ ഇറ്റാലിയന്‍ താരം മര സാന്താഞ്ചലോയോടൊപ്പം പ്രീ ക്വാര്‍ട്ടറില്‍ എത്തി. എതിരാളികളായിരുന്ന സ്വിസ്- പോളണ്ട് ജോഡി സ്റ്റെഫാനി വോയേജലെ- ഉര്‍സുല രാദ്വാന്‍സ്ക സഖ്യം പരിക്ക് മൂലം പിന്‍‌മാറിയതിനാല്‍ സാനിയ സഖ്യത്തിന് വോക്കോവര്‍ ലഭിക്കുകയായിരുന്നു.
രാദ്വാന്‍സ്ക്കയ്ക്കേറ്റ പരിക്കാണ് ടൂര്‍ണ്ണമെന്‍റില്‍ നിന്ന പിന്‍മാറന്‍ സ്വിസ്- പോളണ്ട് ജോഡികളെ നിര്‍ബന്ധിതമാക്കിയത്. ടോപ് സീഡായ സിംബാബ്‌വെയുടെ കാരാ ബ്ലാകിനെയും യുഎസിന്‍റെ ലിസല്‍ ഹബറിനെയുമാണ് രണ്ടാം റൌണ്ടില്‍ സാനിയ-മര സഖ്യം നേരിടുക.
കഴിഞ്ഞ ആഴ്ച നടന്ന പട്ടായ ഓപ്പണിലും സാനിയ-മര ജോഡി മികച്ച പ്രകടനം കാഴ്ച വെച്ചിരുന്നു. ഓസ്ട്രേലിയന്‍ ഓപ്പണ് മിക്സഡ് ഡബിള്‍സില്‍ ഇന്ത്യന്‍ താരം മഹേഷ് ഭൂപതിക്കൊപ്പം സാനിയ കിരീടവും നേടിയിരുന്നു.
