കോണ്ഗ്രസ് കുഴിച്ച കുഴിയില്‍ അവര്‍ തന്നെ വീണിരിക്കുകയാണ്! ഗുജറാത്തില്‍ മാത്രമല്ല, ദേശീയതലത്തില്‍ തന്നെ കോണ്‍ഗ്രസിന്റെ ശത്രുവാണ് മുഖ്യമന്ത്രി നരേന്ദ്രമോഡി. എന്നാല്‍ പത്രപരസ്യത്തിലൂടെ മോഡിയെ പുകഴ്ത്തി വെട്ടിലായിരിക്കുകയാണ് കോണ്ഗ്രസ് ഇപ്പോള്‍. 'മികച്ച സംഘാടകനായ മോഡി ബുദ്ധിമാനായ തെരഞ്ഞെടുപ്പ് തന്ത്രശാലിയും കൂടിയാണ്’ എന്നാണ് പരസ്യത്തില്‍ പറയുന്നത്.
റിപ്പബ്ലിക് ദിനത്തില്‍ ഗുജറാത്തിലെ പ്രദേശികപത്രങ്ങളുടെ കൂടെ പുറത്തിറങ്ങിയ രണ്ട് പേജ് സപ്ലിമെന്റിലാണ് മോഡിയെ വാഴ്ത്തുന്നത്. സംസ്ഥാന രൂപീകരണം മുതലുള്ള മുഖ്യമന്ത്രിമാരെ കുറിച്ചും അവര്‍ കൈവരിച്ച നേട്ടങ്ങളെക്കുറിച്ചും പരസ്യത്തില്‍ വിശദീകരിക്കുന്നുണ്ട്. ഇക്കൂട്ടത്തില്‍ മോഡി കൈവരിച്ച നേട്ടങ്ങളും അക്കമിട്ട് നിരത്തുന്നുണ്ട്. ചുരുക്കത്തില്‍ മോഡിയെ താഴ്ത്തിക്കെട്ടാനുള്ള ശ്രമം അദ്ദേഹത്തിന് ഗുണകരമായി മാറുകയും ചെയ്തു.
ഡിസംബറില്‍ നടക്കാനിരിക്കുന്ന നിയമസഭാ തെരഞ്ഞെടുപ്പ് മുന്നില്‍ കണ്ടാണ് കോണ്ഗ്രസ് പരസ്യം നല്‍കിയത്. തങ്ങളുടെ മുഖ്യമന്ത്രിമാരെക്കാള്‍ ഉപരിയായി മോഡി ഒന്നും ചെയ്തിട്ടില്ലെന്ന് തുറന്നുകാട്ടാനാണ് ശ്രമിച്ചത് എന്ന് വാദിച്ച് ഉരുണ്ടുകളിക്കുകയാണ് സംസ്ഥാനത്തെ കോണ്ഗ്രസ് നേതാക്കള്‍ ഇപ്പോള്‍.
