തെന്നിന്ത്യയുടെ ഗ്ലാമര് നായിക നമിതയെ തട്ടിക്കൊണ്ടുപോയി. തമിഴ്നാട്ടിലെ തിരുച്ചിറപ്പള്ളിയിലാണ് സംഭവം. ഡ്രൈവര് ചമഞ്ഞ് നടിയെ തട്ടിക്കൊണ്ടുപോയ അജ്ഞാതനെ പൊലീസ് അറസ്റ്റുചെയ്തു.
കരൂരില്‍ ഒരു പരിപാടിയില്‍ പങ്കെടുക്കുന്നതിനാണ് നമിത രാവിലെ തിരിച്ചിറപ്പള്ളിയില്‍ വിമാനമിറങ്ങിയത്. വിമാനത്താവളത്തിനു പുറത്തെത്തിയതും, കരൂരിലെ പരിപാടിയുടെ സംഘാടകര്‍ അയച്ച ഡ്രൈവറാണ് താന്‍ എന്നു പരിചയപ്പെടുത്തി ഒരാള്‍ നമിതയെ കാറില്‍ കയറ്റുകയായിരുന്നു. നമിത കയറിയതും കാര്‍ വേഗത്തില്‍ ഓടിച്ചുപോയി.
എന്നാല്‍ ആ പരിപാടിയുടെ ആള്‍ക്കാര്‍ അയച്ച യഥാര്‍ത്ഥ ഡ്രൈവര് വിമാനത്താവളത്തിലുണ്ടായിരുന്നു. നമിത മറ്റൊരു കാറില്‍ കയറിപ്പോകുന്നതുകണ്ട ഡ്രൈവര് ബഹളം വയ്ക്കുകയും സംഘാടകരെ വിവരമറിയിക്കുകയും ചെയ്തു. തുടര്‍ന്ന് പൊലീസും സംഘാടകരും നമിത കയറിയ കാറിനെ പിന്തുടര്‍ന്നു.
ഏറെനേരം നീണ്ട ചേസിനൊടുവില്‍ നമിതയുമായി കുതിച്ചുപാഞ്ഞ കാറിനെ ഓവര്‍ടേക്ക് ചെയ്ത് തടഞ്ഞു. വ്യാജ ഡ്രൈവറെ ഉടന്‍ തന്നെ പൊലീസ് അറസ്റ്റു ചെയ്തു. ഇയാളുടെ പേര് പെരിയസ്വാമി എന്നാണെന്ന് പൊലീസ് അറിയിച്ചു.
താന്‍ നമിതയുടെ ഒരു ആരാധകനാണെന്നാണ് പെരിയസ്വാമി പൊലീസിനോടു പറഞ്ഞത്. എന്നാല്‍ എന്തിനാണ് തട്ടിക്കൊണ്ടുപോയതെന്നുള്ള ചോദ്യത്തിന് പരസ്പരവിരുദ്ധമായ മറുപടികളാണ് പെരിയസ്വാമി പറയുന്നത്.
എന്തായാലും നമിതയെ രക്ഷിക്കാനായതിന്‍റെ ആശ്വാസത്തിലാണ് പൊലീസും സിനിമാലോകവും.
