പ്രധാനമന്ത്രി നരേന്ദ്രമോദി തന്റെ മന്ത്രിമാര്‍ക്ക് അനൗദ്യോഗികമായി നിശ്ചയിച്ചിട്ടുള്ള പ്രായപരിധിയില്‍ തട്ടി ആനന്ദി ബെന്‍ പുറത്താകാന്‍ സാധ്യത. തന്റെ മന്ത്രിമാര്‍ക്ക് 75 വയസ്സില്‍ കുറവ് പ്രായം മാത്രമായിരിക്കണമെന്നാണ് നരേന്ദ്രമോദിയുടെ അനൗദ്യോഗിക തീരുമാനം. അതു പ്രകാരമാണെങ്കില്‍ ആനന്ദി ബെന്നിന് ഈ നവംബര്‍ 21ന് 75 വയസ്സ് തികയും.

കേന്ദ്ര മന്ത്രിസഭയില്‍ അംഗമായിരുന്ന നജ്മ ഹെപ്തുല്ലയെ 75 വയസ്സ് പിന്നിട്ടതോടെ കഴിഞ്ഞ ദിവസം നീക്കം ചെയ്തിരുന്നു. അടുത്തിടെ മധ്യപ്രദേശിലെ ബിജെപി മുഖ്യമന്ത്രി ശിവ്‌രാജ്‌സിങ് ചൗഹാന്‍ 75 വയസ്സ് കഴിഞ്ഞ രണ്ട് മന്ത്രിമാരെ പുറത്താക്കിയിരുന്നു. മോദി മന്ത്രിസഭ രൂപികരിച്ചപ്പോള്‍ മുതിര്‍ന്ന നേതാക്കളായ എല്‍കെ അഡ്വാനിയെയും മുരളിമനോഹര്‍ ജോഷിയെയും ഒഴിവാക്കിയതും പ്രായക്കണക്കു പറഞ്ഞായിരുന്നു.

അടുത്ത വര്‍ഷം ഗുജറാത്തില്‍ നിയമസഭാ തെരഞ്ഞെടുപ്പ് നടക്കാനിരിക്കുകയാണ്. അടുത്തിടെ നടന്ന തദ്ദേസ തെരഞ്ഞെടുപ്പുകളില്‍ സംസ്ഥാനത്ത് ബിജെപിയുടെ പ്രകടനം മോശമായിരുന്നു. ആനന്ദിബെന്നിന്റെ നേതൃത്വത്തില്‍ തെരഞ്ഞെടുപ്പിനെ നേരിട്ടാല്‍ തിരിച്ചടിയുണ്ടാകുമോ എന്ന ആശങ്കയും ബിജെപിക്കുണ്ട്.