തിരുനെൽവേലി: തമിഴ്‌നാട്ടിൽ കോടതി വളപ്പിന് മുന്നിൽ വെച്ച് ഒരു സംഘം ആളുകൾ യുവാവിനെ വെട്ടിക്കൊലപ്പെടുത്തി. തിരുനെൽവേലി ജില്ലാ കോടതിക്കു മുന്നിൽ വച്ചാണ് ആളുകൾ നോക്കിനിൽക്കെ ഏഴംഗസംഘം മായാണ്ടി (38) എന്ന യുവാവിനെ വെട്ടിക്കൊലപ്പെടുത്തിയത്. സംഭവവുമായി ബന്ധപ്പെട്ടു നാലു പേരെ തിരുനെൽവേലി സിറ്റി പൊലീസ് പിടികൂടി. കൊലയ്ക്ക് ഉപയോഗിച്ച അരിവാളും വെട്ടുകത്തിയും പ്രതികൾ സഞ്ചരിച്ചിരുന്ന കാറും പൊലീസ് കണ്ടെത്തി.

വെള്ളിയാഴ്ച രാവിലെ 10.30 ഓടെയായിരുന്നു സംഭവം. തിരുനെൽവേലി കീലാനത്തം സ്വദേശിയായ മായാണ്ടി രാജാമണി എന്നയാളെ കൊലപ്പെടുത്തിയ കേസിലെ പ്രതിയായിരുന്നു. കേസുമായി ബന്ധപ്പെട്ടു കോടതിയിൽ ഹാജരാകാനായി മായാണ്ടി ജില്ലാ കോടതിയിൽ എത്തിയപ്പോഴായിരുന്നു സംഭവം. കോടതിയിലേക്ക് കയറുന്നതിന് തൊട്ടുമുൻപ് കാറിലെത്തിയ ഏഴംഗ സംഘം ഇയാളെ വെട്ടിവീഴ്ത്തുകയായിരുന്നു.

രക്ഷപ്പെടാൻ ശ്രമിച്ചെങ്കിലും മായാണ്ടിയെ പിന്തുടർന്നെത്തിയ സംഘം വെട്ടിക്കൊലപ്പെടുത്തി. കോടതിക്കു മുന്നിൽ ആളുകൾ നോക്കിനിൽക്കെയായിരുന്നു സംഭവം. മായാണ്ടി കൊലപ്പെടുത്തിയ രാജാമണി എന്നയാളുടെ ബന്ധുക്കളാണ് ഇയാളെ കൊലപ്പെടുത്തിയതെന്നാണ് റിപ്പോർട്ട്. മായാണ്ടിയുടെ നിലിവളി കേട്ടു കോടതിക്കുള്ളിൽനിന്നു പൊലീസ് ഉദ്യോഗസ്ഥർ ഓടിയെത്തിയപ്പോഴേക്കും പ്രതികൾ രക്ഷപ്പെട്ടിരുന്നു.

തുടർന്ന് നടത്തിയ അന്വേഷണത്തിലാണ് നാല് പേരെ പോലീസ് പിടികൂടിയത്. സംഭവസ്ഥലം സന്ദർശിച്ച തിരുനെൽവേലി സിറ്റി പൊലീസ് കമ്മീഷണർ രൂപേഷ് കുമാർ മീണ രക്ഷപ്പെട്ട മറ്റു പ്രതികളെ പിടികൂടാൻ മൂന്നു പ്രത്യേക സംഘങ്ങളെ നിയോഗിച്ചതായി അറിയിച്ചു.
പ്രദേശത്തെ സിസിടിവി ദൃശ്യങ്ങൾ പൊലീസ് പരിശോധിച്ചു വരികയാണ്.