ഗള്‍ഫ് വ്യവസായി സലിമിന്‍റെ കൊലപാതകം കൂടുതല്‍ ദുരൂഹതകളിലേക്ക് നീങ്ങുകയാണ്. സലിമിന് ബിയറില്‍ മയക്കുമരുന്നു ഗുളിക കലര്‍ത്തിക്കൊടുത്ത ശേഷം കൊലപ്പെടുത്തിയെന്നാണ് പ്രതി ഷെരീഫ് പൊലീസിന് മൊഴി നല്‍കിയത്. എന്നാല്‍ സലിം മദ്യപിക്കില്ലെന്ന് സലിമിന്‍റെ ബന്ധുക്കളും നാട്ടുകാരും പറയുന്നു.
ഷെരീഫിനെ കൂടാതെ മറ്റു ചിലര്‍ക്കും കൊലപാതകത്തില്‍ പങ്കുണ്ടാകാമെന്ന സൂചനകളിലേക്കാണ് ഇത് വിരല്‍ ചൂണ്ടുന്നത്. മാത്രമല്ല, സലിമിന്‍റെ ഗള്‍ഫിലെ ചില സുഹൃത്തുക്കള്‍ക്കും ഈ കൊലപാതകത്തില്‍ പങ്കുണ്ടോ എന്ന് പൊലീസ് അന്വേഷിക്കുന്നുണ്ട്.
സലിം പലര്‍ക്കും പണം കടം നല്‍കാറുണ്ട്. എന്നാല്‍ ഷെരീഫിനും മറ്റൊരു സുഹൃത്തിനും മാത്രമേ ഈട് വാങ്ങാതെ പണം നല്‍കാറുള്ളൂ. 35 ലക്ഷം രൂപയാണ് ഷെരീഫ് കടമായി സലിമില്‍ നിന്നും വാങ്ങിയിട്ടുള്ളത്. ഇത് തിരിച്ചുകൊടുക്കാതിരിക്കാനായാണ് കൊലപാതകം ആസൂത്രണം ചെയ്തതെന്നാണ് ഷെരീഫ് മൊഴിനല്‍കിയത്.
എന്നാല്‍, സലിമുമായി സാമ്പത്തിക ഇടപാടുള്ള ചിലരും ബിസിനസ് പങ്കാളികളും സംശയത്തിന്‍റെ നിഴലിലാണ്.
