പൊലീസ് എന്ന് പറഞ്ഞാല്‍ ലാത്തി വീശാന്‍ മാത്രം ഇറങ്ങുന്നവരല്ലെന്ന് തെളിയിച്ചിരിക്കുകയാണ് മലപ്പുറത്തെ പൊലീസുകാര്‍. മലപ്പുറത്ത് നടക്കുന്ന സ്കൂള്‍ കലോത്സവ നഗരിയില്‍ ചുക്ക് വെള്ളം വിതരണം ചെയ്ത് മത്സരാത്ഥികളുടെയും കാണികളുടെയും ദാഹം തീര്‍ത്താണ് മലപ്പുറത്തെ പൊലീസുകാര്‍ വ്യത്യസ്തരാകുന്നത്.
കേരള പൊലീസ് അസോസിയേഷനും പൊലീസ് ഓഫീസേഴ്സ്‌ അസോസിയേഷനും സംയുക്തമായാണ്‌ എംഎസ്പി പരേഡ്‌ ഗ്രൗണ്ടിലും രണ്ടാം വേദിയായ കോട്ടപ്പടി ഗ്രൗണ്ടിലും ചുക്കുകാപ്പിയും ചുക്കുവെള്ളവും വിതരണം ചെയ്ത് മാതൃക കാട്ടുന്നത്.
കഴിഞ്ഞ ദിവസം രാത്രി ചുക്കുകാപ്പിക്കു ആവശ്യക്കാരേറെയായിരുന്നു. കോട്ടക്കല്‍ ആര്യവൈദ്യശാലയില്‍ നിന്നാണ്‌ ചുക്കുവെള്ളത്തിനുള്ള കൂട്ട്‌ എത്തിച്ചത്‌. കാപ്പി തയാറാക്കുന്നതു എംഎസ്പി ക്യാമ്പിലാണ്‌. മലപ്പുറത്തെ കൗണ്ടര്‍ കമാഡന്റ്‌ യു ഷറഫലിയും കോട്ടപ്പടിയിലെ കൗണ്ടര്‍ കെ എന്‍ എഖാദര്‍ എംഎല്‍എയുമാണ്‌ ഉദ്ഘാടനം ചെയ്തത്‌.
എല്ലാ വേദികളിലും കുടിവെള്ളവും ചുക്കുവെള്ളവും എത്തിക്കുന്നുണ്ടെങ്കിലും മറ്റിടങ്ങളില്‍ ഇവ വിതരണം ചെയ്യുന്നത്‌ സംഘാടകരാണ്‌.
