തെരുവു നായ്ക്കളുടെ ആക്രമണത്തില്‍ ഗുരുതരമായി പരുക്കേറ്റ വൃദ്ധൻ മരിച്ചു. വര്‍ക്കല മുണ്ടയില്‍ ചരുവിള വീട്ടില്‍ രാഘവനാണ് (90) മരിച്ചത്. വീടിന്റെ വരാന്തയിൽ ഉറങ്ങിക്കിടക്കവേ ഇന്നു പുലർച്ചെ 4.30 നായിരുന്നു രാഘവന് കടിയേറ്റത്. ഗുരുതരമായി പരുക്കേറ്റതിനെ തുടർന്ന് ഇയാളെ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചിരുന്നു. ആശുപത്രിയിൽ വച്ചാണ് മരണം സംഭവിച്ചത്.

രാഘവന്റെ മുഖത്തും തലക്കും കാലിനുമെല്ലാം നായ്ക്കളുടെ ആക്രമണത്തില്‍ ആഴത്തില്‍ മുറിവേറ്റിരുന്നു. ഉടന്‍ തന്നെ അദ്ദേഹത്തെ താലൂക്ക് ആശുപത്രിയിലെത്തിച്ചെങ്കിലും പിന്നീട്​ അവിടെനിന്നും മെഡിക്കല്‍ കോളജിലേക്ക് മാറ്റി. ഉച്ചക്ക് ശേഷം സ്ഥിതി വഷളായതിനെ തുടര്‍ന്നാണ് ദാരുണമായ അന്ത്യം സംഭവിച്ചത്. അതിനിടെ കോഴിക്കോട്ട് തെരുവു നായയുടെ കടിയേറ്റ് രണ്ടു വയസുകാരിക്ക് ഗുരുതര പരുക്കേല്‍ക്കുകയും ചെയ്തു.