കോട്ടയം : പീഡനക്കേസിൽ പ്രതിയായ വിഴിഞ്ഞം സ്വദേശിയായ യുവാവിനെ സി.ബി.ഐ ഇന്റർപോളിന്റെ സഹായത്തോടെ ഷാർജയിൽ നിന്ന് പിടികൂടി നാട്ടിലെത്തിച്ചു. വിഴിഞ്ഞം വലിയവിളാകം വീട്ടിൽ യഹിയാ ഖാൻ എന്ന നാല്പത്തിമൂന്നുകാരനാണ് പിടിയിലായത്.

കേസിനാസ്പദമായ സംഭവം നടന്നത് 2008 ലായിരുന്നു. വീടുവീടാന്തരം പത്രക്കച്ചവടം നടത്തി വന്നിരുന്ന ഇയാൾ പാലായിലെ ഒരു വീട്ടിൽ ഒറ്റയ്ക്കായിരുന്നു മാനസിക വെല്ലുവിളി നേരിട്ടിരുന്ന പെൺകുട്ടിയെ ക്രൂരമായി പീഡിപ്പിക്കുകയായിരുന്നു. ഇയാളെ പാലാ പോലീസ് അറസ്റ്റ് ചെയ്‌തെങ്കിലും ജാമ്യത്തിൽ ഇറങ്ങിയ ഇയാൾ ഒളിവിൽ പോയി.

മലപ്പുറം, കണ്ണൂർ എന്നീ സ്ഥലങ്ങളിൽ ഒളിവിൽ കഴിഞ്ഞ ശേഷം ഇയാൾ ഷാർജയിലേക്ക് കടന്നിരുന്നു. ജില്ലാ പോലീസ് മേധാവിയുടെ നേതൃത്വത്തിൽ നടന്ന അന്വേഷണത്തിന്റെ അടിസ്ഥാനത്തിൽ സി.ബി.ഐ ഇന്റർപോളിന്റെ സഹായത്തോടെ ഇയാളെ ഷാർജയിൽ നിന്ന് പിടികൂടുകയായിരുന്നു. പ്രതിയെ കഴിഞ്ഞ ദിവസം കൊച്ചിയിൽ എത്തിച്ചു കോടതിയിൽ ഹാജരാക്കി. പാലാ പോലീസ് ഡി.വൈ.എസ്.പി സദൻ ഉൾപ്പെടെയുള്ള സംഘമാണ് പ്രതിയെ കൊച്ചിയിൽ കൊണ്ടുവന്നത്.