യു ഡി എഫ് വിട്ട് പോകാനുള്ള കേരള കോൺഗ്രസിന്റേയും മാണിയുടേയും തീരുമാനം അപഹാസ്യമാണെന്ന് യു ഡി എഫ് കൺവീനർ പി പി തങ്കച്ചൻ. കോൺഗ്രസിൽ ഭിന്നതയുണ്ടാക്കാനാണ് മാണിയുടെ ശ്രമം. എന്നാൽ അത് വിലപ്പോകില്ലെന്നും മാണിയുടെ ഈ തീരുമാനം വിജയിക്കില്ലെന്നും തങ്ക‌ച്ചൻ വ്യക്തമാക്കി. മുന്നണിയിൽ നിന്നും പുറത്ത് പോയ മാണി ഉടൻ തന്നെ രാജിവെക്കണമെന്നും മാണിയുടെ ഈ നിലപാടിൽ ദുരൂഹതയുണ്ടെന്നും അദ്ദേഹം പറഞ്ഞു.

കോൺഗ്രസിന്​ നല്ല കാലമാണ്​ വരാൻ പോകുന്നുവെന്ന് ടി.എൻ പ്രതാപൻ പറഞ്ഞു. മാണി മുന്നണി വിട്ട്​ പോയാൽ കോൺ​ഗ്രസിന്​ ഒന്നും സംഭവിക്കില്ല. പഞ്ചായത്തുകളിൽ ഇനി മാണിയുടെ പിന്തുണ വേണ്ടെന്നും പ്രതാപൻ കൂട്ടിച്ചേർത്തു. അതേസമയം, മാണി മുന്നണി വിട്ട കാര്യത്തിൽ തന്റെ നിലപാട് നാളെ അറിയിക്കാമെന്ന് പ്രതിപക്ഷ നേതാവ് രമേശ് ചെന്നിത്തല പ്രതികരിച്ചു.

കഴിഞ്ഞ നിയമസഭ തെരഞ്ഞെടുപ്പിൽ മാണിയെ സംരക്ഷിച്ചത്​ കൊണ്ടാണ്​ തെരഞ്ഞെടുപ്പിൽ കനത്ത തോൽവി ഏൽക്കേണ്ടി വന്നതെന്ന്​ വി ഡി സതീശൻ അഭിപ്രായപ്പെട്ടു. മാണി മുന്നണി വിട്ടതിൽ സങ്കടമുണ്ടെന്ന് മുൻ മുഖ്യമന്ത്രി ഉമ്മൻചാണ്ടി പ്രതികരിച്ചു.