രക്ഷാബന്ധന്‍ ദിനത്തില്‍ കര്‍ദ്ദിനാളിന് രാഖി കെട്ടി മഹിളാമോര്‍ച്ച പ്രവര്‍ത്തകര്‍. സീറോ മലബാര്‍ സഭ മേജര്‍ ആര്‍ച്ച് ബിഷപ്പ് കര്‍ദ്ദിനാള്‍ മാര്‍ ജോര്‍ജ് ആലഞ്ചേരിയുടെ കൈകളിലാണ് രാഖി കെട്ടിയത്. മഹിളാമോര്‍ച്ച എറണാകുളം ജില്ല പ്രസിഡന്റ് ജി മഹേശ്വരിയാണ് രാഖി കെട്ടിയത്.

അതേസമയം, രാഖിയില്‍ രാഷ്‌ട്രീയമില്ലെന്ന് മാര്‍ ജോര്‍ജ് ആലഞ്ചേരി പറഞ്ഞു. സ്നേഹത്തിന്റെയും സാഹോദര്യത്തിന്റെയും ചടങ്ങായി കാണണം. ഭാരതത്തിലെ സ്ത്രീകളെ സഹോദരിമാരായി കണ്ട് സംരക്ഷിക്കാനും സ്നേഹിക്കാനുമുള്ള ഉത്തരവാദിത്വത്തിന്റെ ഓര്‍മ്മപ്പെടുത്തലാണ് ഇതെന്നും അദ്ദേഹം പറഞ്ഞു.

സഭയുടെ കേന്ദ്ര കാര്യാലയമായ കാക്കനാട് മൌണ്ട് സെന്റ് തോമസിലെത്തിയാണ് രാഖി കെട്ടിയത്. ആ‍രതിയുഴിഞ്ഞ് വന്ദിച്ച് കാലില്‍ തൊട്ട് നമസ്കരിച്ച ശേഷമായിരുന്നു രാഖിച്ചരട് കൈയില്‍ കിട്ടിയത്. മഹിളാമോര്‍ച്ച ഭാരവാഹികളും ബി ജെ പി നേതാക്കളും ഒപ്പമുണ്ടായിരുന്നു.