ബിഗ്‌ബോസ് മത്സരാര്‍ഥിയും നടനുമായ പരീക്കുട്ടി എക്‌സൈസ് പിടിയില്‍. എംഡിഎംഎ, കഞ്ചാവ് എന്നീ മയക്കുമരുന്നുകള്‍ കൈവശം വെച്ചതിനാണ് പരീക്കുട്ടിയും സുഹൃത്തും അറസ്റ്റിലായത്. മൂലമറ്റം എക്‌സൈസ് സംഘമാണ് പരീക്കുട്ടി എന്ന ഫരീദ്ദുദ്ദീനെയും കൂട്ടാളിയേയും അറസ്റ്റ് ചെയ്തത്. ഇവരില്‍ നിന്നും 230 മില്ലിഗ്രാം എംഡിഎംഎയും നാല്‍ ഗ്രാം കഞ്ചാവും പിടിച്ചെടുത്തു.

ജിസ്‌മോണ്‍(34) എന്ന കോഴിക്കോട് സ്വദേശിയാണ് പരീക്കുട്ടിക്കൊപ്പം അറസ്റ്റിലായത്. ശനിയാഴ്ച ഉച്ചയ്ക്ക് പുള്ളിക്കാനം എസ് വളവില്‍ നടന്ന വാഹനപരിശോധനയിലാണ് ഇവരുടെ വാഹനത്തില്‍ നിന്നും ലഹരിവസ്തുക്കള്‍ കണ്ടെത്തിയത്. ഇവര്‍ സഞ്ചരിച്ചിരുന്ന കാര്‍ പിടിച്ചെടുത്തതായി എക്‌സൈസ് സംഘം അറിയിച്ചു. കാറിനുള്ളില്‍ പിറ്റ്ബുള്‍ ഇനത്തില്‍ പെട്ട നയയും കുട്ടിയും ഉണ്ടായിരുന്നതിനാല്‍ ഏറെ കഷ്ടപ്പെട്ടാണ് എക്‌സൈസ് ഇവരെ അറസ്റ്റ് ചെയ്തത്. പിടിയിലായിരുന്ന സമയത്ത് പരീക്കുട്ടിയും ജിസ്‌മോനും എംഡിഎംഎ ഉപയോഗിച്ചിരുന്നതായാണ് അന്വേഷണ സംഘം പറയുന്നത്. വാണിജ്യാവശ്യത്തിനുള്ള അളവില്‍ എംഡിഎംഎയാണ് പിടികൂടിയിരിക്കുന്നതെന്നും ഇരുവരുടെയും അറസ്റ്റ് രേഖപ്പെടുത്തിയെന്നും എക്‌സൈസ് ഉദ്യോഗസ്ഥര്‍ പറഞ്ഞു.