രേണുക വേണു|
Last Modified ബുധന്‍, 14 ഓഗസ്റ്റ് 2024 (11:55 IST)
ഒമാനില്‍ വീണ്ടും വീസ വിലക്ക് ഏര്‍പ്പെടുത്തി തൊഴില്‍ മന്ത്രാലയം. നിര്‍മാണ തൊഴിലാളികള്‍, ശുചീകരണ തൊഴിലാളികള്‍, തയ്യല്‍ തൊഴിലാളികള്‍ തുടങ്ങി ഏതാനും തസ്തികകളിലേക്കാണ് ആറ് മാസത്തെ വീസ വിലക്ക് ഏര്‍പ്പെടുത്തിയിരിക്കുന്നത്. സെപ്റ്റംബര് ഒന്ന് മുതല്‍ വിലക്ക് പ്രാബല്യത്തില്‍ വരും.
നിര്‍മാണ തൊഴിലാളികള്‍/ജനറല്‍, ശുചീകരണ തൊഴിലാളികള്‍/ജനറല്‍ ബില്‍ഡിങ്‌സ്, ലോഡിങ്, അണ്‍ലോഡിങ് തൊഴില്‍ മേഖല, തയ്യല്‍ മേഖല, ഇലക്ട്രീഷ്യന്‍, വെയ്റ്റര്‍, പെയിന്റര്‍, ഷെഫ്, ബാര്‍ബര്‍ തുടങ്ങിയ മേഖലകളിലേക്കുള്ള വീസയ്ക്ക് വിലക്ക് ബാധകമാണ്.
സ്വദേശികള്‍ക്ക് കൂടുതല്‍ തൊഴില്‍ സാധ്യത ഒരുക്കുകയെന്ന ലക്ഷ്യത്തോടെയാണ് വീസ നിയന്ത്രണം. എന്നാല്‍ ഈ തസ്തികകളില്‍ നിലവിലുള്ള വീസ പുതുക്കുന്നതിനോ സ്ഥാപനം മാറുന്നതിനോ തടസമുണ്ടാകില്ല. മലയാളികള്‍ അടക്കം നിരവധി തൊഴിലാളികള്‍ക്ക് തിരിച്ചടിയാകുന്ന തീരുമാനമാണ് ഒമാന്‍ തൊഴില്‍ മന്ത്രാലയത്തിന്റേത്.
