മരുന്നടി വിവാദത്തില്‍ അകപ്പെട്ട മരിയ ഷറപ്പോവയ്‌ക്ക് എതിരെ നടപടിയെടുക്കണമെന്ന് ടെന്നിസ് താരം റാഫേല്‍ നദാല്‍ രംഗത്ത്. താന്‍ ഒരിക്കലും ഇത്തരത്തിലുള്ള നിരോധിത പ്രവര്‍ത്തനങ്ങളില്‍ ഏര്‍പ്പെട്ടിട്ടില്ല. തനിക്ക് പരുക്കുകള്‍ ധാരാളമായി സംഭവിക്കാറുണ്ടെങ്കിലും പരുക്കുകള്‍ ഭേദമാകാനോ കൂടുതല്‍ ഊര്‍ജ്ജം കിട്ടാനോ ഒരുതരത്തിലുള്ള മരുന്നുകളും ഉപയോഗിക്കണമെന്ന് തോന്നിയിട്ടില്ല. താന്‍ ഉത്തേജക മരുന്ന് ഉപയോഗിക്കാറുണ്ടെന്ന് അപവാദങ്ങള്‍ പരക്കുന്നുണ്ട്. ആരും ഇത്തരം കുപ്രചാരണങ്ങള്‍ വിശ്വസിക്കരുതെന്നും നദാല്‍ വ്യക്തമാക്കി.

റഷ്യന്‍ സുന്ദരി ഉത്തേജക മരുന്ന് ഉപയോഗിച്ചെന്ന് കണ്ടെത്തിയതിനെ തുടര്‍ന്ന് ഇന്റര്‍നാഷണല്‍ ടെന്നീസ് ഫെഡറേഷന്‍ ഈ മാസം 12 മുതല്‍ മത്സരങ്ങളില്‍ പങ്കെടുക്കാന്‍ വിലക്കേര്‍പ്പെടുത്തുകയായിരുന്നു. ഓസ്‌ട്രേലിയന്‍ ഓപ്പണിന് മുന്നോടിയായി നടത്തിയ പരിശോധനയില്‍ മരുന്ന് ഉപയോഗം കണ്ടെത്തിയെന്ന് ഷറപ്പോവ തന്നെയാണ് വെളിപ്പെടത്തിയത്.

ശാരീരികമായ ചില പ്രശ്നങ്ങള്‍ക്ക് കുടുംബ ഡോക്ടറുടെ നിര്‍ദേശത്തെത്തുടര്‍ന്ന് മൈഡ്രോണേറ്റ് എന്ന മരുന്നാണ് താന്‍ കഴിച്ചിരുന്നതെന്നും അതിന് മെല്‍ഡോണിയം എന്ന മറ്റൊരു പേരു കൂടിയുണ്ടെന്നോ അത് ഉത്തേജക മരുന്നിന്റെ ഇനത്തില്‍പ്പെടുന്നതാണെന്നോ തനിക്ക് അറിയില്ലായിരുന്നൂ. താന്‍ 10 വര്‍ഷമായി ഉപയോഗിക്കുന്ന മരുന്നില്‍ നിന്നാകം മെല്‍ഡോണിയം ശരീരത്തിലെത്തിയതെന്നും ഷറപ്പോവ പറഞ്ഞു.