പൃഥ്വിയും കാവ്യയും - ‘സമയം കടന്ന് ആകാശത്തിന്‍റെ നിറങ്ങള്‍’
WEBDUNIA|
PRO
സമീപകാലത്ത് ഏറ്റവും ശ്രദ്ധേയമായ സിനിമകളാണ് വീട്ടിലേക്കുള്ള വഴി, ഭക്തജനങ്ങളുടെ ശ്രദ്ധയ്ക്ക് എന്നിവ. ഡോ. ബിജു സംവിധാനം ചെയ്ത ‘വീട്ടിലേക്കുള്ള വഴി’ ഏറ്റവും മികച്ച മലയാള ചിത്രത്തിനുള്ള ദേശീയ പുരസ്കാരം നേടി. കേരളത്തെ വിഴുങ്ങുന്ന ആള്‍ദൈവങ്ങളും മദ്യപാനശീലവും പ്രമേയമാക്കി കൈയടി നേടിയ സിനിമയാണ് പ്രിയനന്ദനന്‍റെ ഭക്തജനങ്ങളുടെ ശ്രദ്ധയ്ക്ക്. ഈ സിനിമകളുടെ ആവേശത്തില്‍ രണ്ടു സംവിധായകരും തങ്ങളുടെ പുതിയ സിനിമകള്‍ പ്രഖ്യാപിച്ചുകഴിഞ്ഞു.
ഭക്തജനങ്ങളുടെ ശ്രദ്ധയ്ക്ക് ശേഷം പ്രിയനന്ദനന്‍ സംവിധാനം ചെയ്യുന്ന ചിത്രത്തിന് ‘സമയം കടന്ന്’ എന്ന് പേരിട്ടു. കാവ്യാ മാധവന്‍ തന്നെ ഈ ചിത്രത്തിലും നായികയാകും. വൈശാഖന്‍റെ ഇതേ പേരിലുള്ള കഥ അടിസ്ഥാനമാക്കിയാണ് പ്രിയനന്ദനന്‍ ചിത്രമൊരുക്കുന്നത്. സി വി ബാലകൃഷ്ണനാണ് തിരക്കഥയെഴുതുന്നത്.
വീട്ടിലേക്കുള്ള വഴിക്ക് ശേഷം ഡോ. ബിജു സംവിധാനം ചെയ്യുന്ന ചിത്രത്തിന് ‘ആകാശത്തിന്‍റെ നിറങ്ങള്‍’ എന്ന് പേരിട്ടു. പൃഥ്വിരാജ് തന്നെയായിരിക്കും നായകന്‍. ആന്‍ഡമാന്‍ ദ്വീപില്‍ ജീവിക്കാന്‍ നിര്‍ബന്ധിതരാകുന്ന ഒരുകൂട്ടം മനുഷ്യരുടെ കഥയാണ് ഈ ചിത്രം. ബിജു ഇപ്പോള്‍ ഈ സിനിമയ്ക്ക് തിരക്കഥ രചിച്ചുകൊണ്ടിരിക്കുകയാണ്. അമ്പലക്കര ഫിലിംസ് നിര്‍മ്മിക്കുന്ന ഈ ചിത്രം ആന്‍ഡമാനിലായിരിക്കും ചിത്രീകരിക്കുക.
ഇന്ദ്രജിത്ത്, നെടുമുടിവേണു, അനൂപ് ചന്ദ്രന്‍ തുടങ്ങിയവരും ആകാശത്തിന്‍റെ നിറങ്ങളില്‍ അഭിനയിക്കുന്നുണ്ട്.
