ചിരിയുടെ വസന്തമൊരുക്കിയ സിനിമയായിരുന്നു കല്യാണരാമന്‍. ഷാഫി - ദിലീപ് - ബെന്നി പി നായരമ്പലം ടീം സൃഷ്ടിച്ച ആ ചിരിയുത്സവത്തിന്‍റെ ഓര്‍മ്മ ഇപ്പോഴും മലയാളിയെ വിട്ടു മാറിയിട്ടില്ല. ഇപ്പോഴിതാ, അതേ ടീം വീണ്ടും ഒന്നിക്കുന്നു. ബെന്നിയുടെ തിരക്കഥയില്‍ ഷാഫി സംവിധാനം ചെയ്ത് ദിലീപ് നായകനാകുന്ന ചിത്രത്തിന് പേരിട്ടു - ഹാരി പോട്ടര്‍!
കുട്ടികളുടെ കൂട്ടുകാരനായ ഹോളിവുഡിലെ ഹരി പോട്ടറെ പോലെ ഈ മലയാള ചിത്രവും കുട്ടികളെ ലക്‍ഷ്യം വച്ചുള്ളതാണ്. ഒന്നിനുപിറകെ മറ്റൊന്നായി മാലപ്പടക്കം പോലെ ചിരിയമിട്ടുകള്‍ കൊരുത്തിട്ടുള്ള ഒരു തിരക്കഥയാണ് ബെന്നി ഈ ചിത്രത്തിനു വേണ്ടി ഒരുക്കിയിരിക്കുന്നതെന്ന് സംവിധായകന്‍ പറയുന്നു.
വൈശാഖ് മൂവീസ് നിര്‍മ്മിക്കുന്ന ഈ ചിത്രത്തിലെ നായികയെ തീരുമാനിച്ചിട്ടില്ല. മേക്കപ്‌മാന്‍ എന്ന ജയറാം ചിത്രത്തിന് ശേഷം ജൂണില്‍ ഷാഫി ഹരി പോട്ടറുടെ ചിത്രീകരണം ആരംഭിക്കും. ദിലീപിന്‍റെ ഓണച്ചിത്രമായിരിക്കും ഇത്. സലിം‌കുമാര്‍, ഇന്നസെന്‍റ്, സുരാജ് വെഞ്ഞാറമ്മൂട്, നാരായണകുട്ടി തുടങ്ങിയവരും ഈ ചിത്രത്തിലെ താരങ്ങളാണ്.
കല്യാണരാമന്‍ കഴിഞ്ഞ് എട്ടുവര്‍ഷങ്ങള്‍ക്കു ശേഷമാണ് ആ ടീം വീണ്ടും ഒന്നിക്കുന്നത്. ആ വമ്പന്‍ ഹിറ്റിനു ശേഷം മമ്മൂട്ടിയും പൃഥ്വിരാജുമായിരുന്നു ഷാഫിയുടെ സ്ഥിരം നായകന്‍‌മാര്‍. ബെന്നി പി നായരമ്പലവും ദിലീപ് ചിത്രം എഴുതുന്നത് ഒരു ഇടവേളയ്ക്ക് ശേഷമാണ്. കല്യാണരാമന്‍ കൂടാതെ ദിലീപിന്‍റെ വന്‍ ഹിറ്റുകളായ മന്ത്രമോതിരം, കുഞ്ഞിക്കൂനന്‍, ചാന്തുപൊട്ട് തുടങ്ങിയവ എഴുതിയതും ബെന്നിയായിരുന്നു.
