മമ്മൂട്ടിയും മോഹൻലാലും ഒന്നിക്കുന്നു എന്ന വാര്‍ത്ത ആരാധകര്‍ ചര്‍ച്ചയാക്കുകയാണ്. കൊളംബോ ആണ് ചിത്രത്തിന്റെ ആദ്യ ലൊക്കേഷൻ. ഇവിടെയുള്ള സീനുകൾ ഷൂട്ട് ചെയ്യുന്നതിനായി മമ്മൂട്ടി, മോഹൻലാൽ, കുഞ്ചാക്കോ ബോബൻ തുടങ്ങിയവർ കൊളംബോയിൽ എത്തിക്കഴിഞ്ഞു. മലയാള സിനിമ ഇതുവരെ കണ്ടിട്ടില്ലാത്ത ഒരു ഐറ്റമാണിതെന്ന് നേരത്തെ കുഞ്ചാക്കോ ബോബൻ പറഞ്ഞിരുന്നു. പുതിയ റിപ്പോർട്ടുകൾ പ്രകാരം ചിത്രത്തിന്റെ കാസ്റ്റിങ് ഏകദേശം പൂർത്തിയായി കഴിഞ്ഞു.

മമ്മൂട്ടി-മോഹൻലാൽ ഒന്നിക്കുന്ന ചിത്രത്തിൽ നായികമാരായി മഞ്ജു വാര്യർ, നയൻതാര എന്നിവരെയാണ് കാസ്റ്റ് ചെയ്തിരിക്കുന്നത്. കന്നട താരം ശിവരാജ് കുമാർ, സൗബിൻ ഷാഹിർ, വിവേക് ഒബ്റോയ്, ഉണ്ണി മുകുന്ദൻ, ആസിഫ് അലി തുടങ്ങിയവരാണ് മറ്റു താരങ്ങൾ. തെലുങ്ക് സൂപ്പർ താരം വെങ്കിടേഷും നസ്ളനും അതിഥിതാരമായി എത്തുന്നു. ടോവിനോ തോമസും ചിത്രത്തിലുണ്ട്. സാമന്ത ഒരു ഗാനരംഗത്തിനായും കരാർ ഒപ്പിട്ടെന്നാണ് സൂചന. ഇതാദ്യമായാണ് സാമന്തയും ശിവരാജ് കുമാറും വെങ്കിടേഷും മലയാളചിത്രത്തിന്റെ ഭാഗമാകുന്നത്. കേരളം കൗമുദി ആണ് ഇകകാര്യം റിപ്പോർട്ട് ചെയ്തിരിക്കുന്നത്.

ശ്രീലങ്കയിൽ ചിത്രീകരണം പുരോഗമിക്കുന്ന ചിത്രത്തിന്റെ അടുത്ത ലൊക്കേഷൻ ഷാർജ ആണ്. 6 ദിവസമാണ് ശ്രീലങ്കയിൽ പ്ലാൻ ചെയ്തിരിക്കുന്നത്. മമ്മൂട്ടിയുടേയും മോഹൻലാലിന്റേയും കോമ്പിനേഷൻ സീനുകളിലാണ് ഇവിടെ ചിത്രീകരിക്കുന്നത്. കുഞ്ചാക്കോ ബോബനും ഈ സീനിൽ ഉണ്ടെന്നാണ് റിപ്പോർട്ട്. ഷാർജയിലെ ഷൂട്ടിങ് കഴിഞ്ഞാൽ ഡൽഹി, ബോംബെ, കേരളം എന്നിവടങ്ങളിലും ഷൂട്ടിങ് നടത്തും.

ട്വന്റി 20 എന്ന ചിത്രത്തിനുശേഷം മലയാളത്തിലെ ഒട്ടുമിക്ക താരങ്ങളെയും അണിനിരത്തി ബിഗ് ക്യാൻവാസിൽ ഒരുങ്ങുന്ന ചിത്രം ആന്റോ ജോസഫ് ഫിലിം കമ്പനിയുടെ ബാനറിൽ ആണ് നിർമ്മാണം.