രണ്ടാം വരവ് മീരാ ജാസ്മിന് ഗംഭീരമാക്കുകയാണ്. രാജീവ് അഞ്ചലിന്‍റെ പാട്ടിന്‍റെ പാലാഴി എന്ന സിനിമയിലൂടെയാണ് മീര മലയാളത്തിലേക്ക് മടങ്ങിയെത്തുന്നത്. എന്നാല്‍ അതിലും പ്രധാനപ്പെട്ട ഒരു വാര്‍ത്ത പുറത്തുവന്നിരിക്കുന്നു. മമ്മൂട്ടിയും, പൃഥ്വിരാജും ഒന്നിക്കുന്ന പുതിയ ചിത്രത്തില്‍ മീരാ ജാസ്മിന് നായികയാകുന്നു!
നവാഗതനായ വൈശാഖ് സംവിധാനം ചെയ്യുന്ന ‘പോക്കിരിരാജ’ എന്ന ചിത്രത്തിലാണ് മീര നായികയാകുന്നത്. ഈ ചിത്രത്തിന്‍റെ കരാറില്‍ മീര ഒപ്പുവച്ചതായാണ് വിവരം. ഈ സിനിമയില്‍ അഭിനയിക്കാന്‍ പതിനഞ്ച് ലക്ഷത്തിലധികം രൂപയാണ് മീര പ്രതിഫലം വാങ്ങുന്നതത്രേ!. എന്തായാലും മോഹന്‍ലാലിന്‍റെ നായികയാകാന്‍ കാവ്യാ മാധവന്‍ ഒരുങ്ങുമ്പോള്‍ മമ്മൂട്ടിയുടെ നായികയായി മീരയും സജീവമാകുകയാണ്.
‘ഒരേ കടല്‍’ എന്ന സിനിമയിലാണ് ഇതിനുമുമ്പ് മമ്മൂട്ടിയും മീരയും ഒന്നിച്ചത്. അതൊരു ഓഫ്ബീറ്റ് ചിത്രമായിരുന്നെങ്കില്‍ പോക്കിരിരാജ പക്കാ കൊമേഴ്സ്യല്‍ മസാലയാണ്. ഗുണ്ടകളായ ജ്യേഷ്ടന്‍റെയും അനുജന്‍റെയും കഥയാണ് പോക്കിരിരാജ. മമ്മൂട്ടിയുടെ അനുജനായാണ് പൃഥ്വിരാജ് വേഷമിടുന്നത്.
സ്വപ്നക്കൂട്, ചക്രം എന്നീ സിനിമകള്‍ക്ക് ശേഷം പൃഥ്വിരാജ് അഭിനയിക്കുന്ന ചിത്രത്തില്‍ മീര നായികയാകുന്നു എന്ന പ്രത്യേകതയും പോക്കിരിരാജയ്ക്കുണ്ട്. ഒരുകാലത്ത് ഗോസിപ്പ് കോളങ്ങളില്‍ നിറഞ്ഞു നിന്നവരാണ് പൃഥ്വിയും മീരയും. മീര നായികയാകുന്നു എന്ന കാരണം കൊണ്ടാണ് ‘രാത്രിമഴ’ എന്ന ചിത്രത്തില്‍ നിന്ന് പൃഥ്വിരാജ് പിന്‍‌മാറിയത് എന്നുപോലും കഥകള്‍ പ്രചരിച്ചു. കഥകള്‍ക്കെല്ലാം വിരാമമിട്ട്, മീര വീണ്ടും പൃഥ്വിയോടൊപ്പം പോക്കിരിരാജയില്‍ കൂട്ടുചേരുന്നു.
