കൊച്ചിയില്‍ യുവനടിയെ തട്ടിക്കൊണ്ടു പോയി ഉപദ്രവിച്ച കേസിലെ അന്വേഷണം പുരോഗമിക്കുന്നതിനിടെ വിദേശ യാത്ര റദ്ദാക്കാൻ പ്രത്യേക അന്വേഷണ സംഘം ആവശ്യപ്പെട്ടുവെന്ന് വാര്‍ത്തകള്‍ പ്രചരിച്ചിരുന്നു. എന്നാല്‍, വാര്‍ത്തകള്‍ തീര്‍ത്തും അടിസ്ഥാന രഹിതമെന്ന റിപ്പോര്‍ട്ടുകളാണ് പുറത്തുവരുന്നത്.

അമേരിക്കയില്‍ നടക്കുന്ന രണ്ടാമത് നാഫാ അവാര്‍ഡ് നിശയില്‍ മറ്റു നടീനടന്മാര്‍ക്കൊപ്പം മഞ്ജു വാര്യരും പങ്കെടുക്കും. നിവിന്‍ പോളി, കുഞ്ചാക്കോ ബോബന്‍, ടൊവിനൊ തോമസ്, ഭാവന തുടങ്ങിയവര്‍ക്കൊപ്പം നോര്‍ത്ത് അമേരിക്കന്‍ ഫിലിം പുരസ്‌കാരം ഏറ്റുവാങ്ങാന്‍ മഞ്ജു വാര്യരും ഉണ്ട്. ഈ യാത്ര സ്ഥിരീകരിക്കുന്ന റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്.

തിരക്കിട്ട ഷൂട്ടിങ്ങ് ഷെഡ്യൂളായതിനാല്‍ താരം യാത്ര റദ്ദാക്കിയെന്ന തരത്തിലായിരുന്നു നേരത്തെ വാര്‍ത്തകള്‍ പ്രചരിച്ചിരുന്നത്. രണ്ടാമത് നാഫാ നൈറ്റില്‍ മികച്ച നടിക്കുള്ള പുരസ്‌കാരം ഏറ്റുവാങ്ങുന്നതിനോടൊപ്പം, നടത്തുന്ന കലാപരിപാടികളിലും മഞ്ജുവിന്റെ സാന്നിധ്യം ഉണ്ടാകുമെന്നാണ് റിപ്പോര്‍ട്ടുകള്‍.

നോര്‍ത്ത് അമേരിക്കന്‍ ഫിലിം അവാര്‍ഡില്‍ മികച്ച നടിക്കുള്ള പുരസ്‌കാരമാണ് മഞ്ജു വാര്യര്‍ക്ക് ലഭിച്ചത്. കരിങ്കുന്നം സിക്‌സസ്, വേട്ട തുടങ്ങിയ ചിത്രങ്ങളിലൂടെയാണ് താരം ഈ പുരസ്‌കാരത്തിന് അര്‍ഹയായത്. മികച്ച ചിത്രമായി മഹേഷിന്റെ പ്രതികാരം തിരഞ്ഞെടുക്കപ്പെട്ടു. മികച്ച നടനായി നിവിന്‍ പോളിയെ തിരഞ്ഞെടുത്തു. സഹനടി ആശാ ശരത്ത്, ജനപ്രിയ നായകന്‍ ബിജു മേനോന് തുടങ്ങിയവര്‍ക്കും പുരസ്‌കാരം ലഭിച്ചിട്ടുണ്ട്.