ദിലീപിന്‍റെ കരിയറിലെ വഴിത്തിരിവായിരുന്നു സല്ലാപം എന്ന ചിത്രം. ‘കല്യാണരാമന്‍’ ആകട്ടെ ദിലീപിന്‍റെ ഏറ്റവും വലിയ മെഗാഹിറ്റുകളില്‍ ഒന്ന്. സല്ലാപത്തിന്‍റെ സംവിധായകനും കല്യാണരാമന്‍റെ തിരക്കഥാകൃത്തും ഒരുമിച്ചാലോ? അതില്‍ ദിലീപ് തന്നെ നായകനായാലോ? അതേ, അങ്ങനെയൊരു പ്രൊജക്‍ട് സംഭവിക്കുകയാണ്.
ബെന്നി പി നായരമ്പലത്തിന്‍റെ തിരക്കഥയില്‍ സുന്ദര്‍ദാസ് സംവിധാനം ചെയ്യുന്ന ദിലീപ് ചിത്രം ഒരു ഫാമിലി എന്‍റര്‍ടെയ്നറായിരിക്കും. ചിത്രത്തിന് ‘വെല്‍കം ടു സെന്‍‌ട്രല്‍ ജയില്‍’ എന്നാണ് പേര്. പൂര്‍ണമായും സെന്‍‌ട്രല്‍ ജയിലിന്‍റെ പശ്ചാത്തലത്തിലാണ് സിനിമയുടെ കഥ പുരോഗമിക്കുന്നത്. ഉണ്ണിക്കുട്ടന്‍ എന്ന കഥാപാത്രത്തെയാണ് ദിലീപ് ഈ സിനിമയില്‍ അവതരിപ്പിക്കുന്നത്.
വൈശാഖ് രാജന്‍ നിര്‍മ്മിക്കുന്ന ഈ സിനിമ ഈ മാസം ചിത്രീകരണം ആരംഭിക്കുകയാണ്. ചിത്രം വിഷു റിലീസ് ആണെന്നാണ് ആദ്യ റിപ്പോര്‍ട്ട്. വേദികയാണ് ചിത്രത്തിലെ നായിക. ശൃംഗാരവേലന്‍ എന്ന ഹിറ്റിന് ശേഷം ദിലീപും വേദികയും വീണ്ടും ഒന്നിക്കുന്നു എന്ന പ്രത്യേകതയും ഈ പ്രൊജക്ടിനുണ്ട്.
സല്ലാപം, കുടമാറ്റം, വര്‍ണക്കാഴ്ചകള്‍, കുബേരന് എന്നീ ദിലീപ് സിനിമകള്‍ സുന്ദര്‍ദാസ് സംവിധാനം ചെയ്തിട്ടുണ്ട്. കുബേരന് ശേഷം ദിലീപും സുദര്‍ദാസും തമ്മില്‍ ചില അഭിപ്രായ വ്യത്യാസങ്ങള്‍ ഉണ്ടാകുകയും ഇനി സുന്ദര്‍ദാസിനൊപ്പം സിനിമ ചെയ്യില്ലെന്ന് ദിലീപ് തീരുമാനിച്ചു എന്നും ഗോസിപ്പ് പരന്നിരുന്നു. എന്നാല്‍ എല്ലാ അഭിപ്രായവ്യത്യാസങ്ങളും മറന്ന് പഴയ കൂട്ടുകാരനൊപ്പം ദിലീപ് ചേരുകയാണ് ‘വെല്‍കം ടു സെന്‍‌ട്രല്‍ ജയില്‍’ എന്ന പ്രൊജക്ടിലൂടെ. 2013ല്‍ പുറത്തിറങ്ങിയ റബേക്ക ഉതുപ്പ് കിഴക്കേമല എന്ന ചിത്രമാണ് സുന്ദര്‍ദാസ് ഒടുവില്‍ സംവിധാനം ചെയ്തത്.
മന്ത്രമോതിരം, കല്യാണരാമന്‍, കുഞ്ഞിക്കൂനന്‍, ചാന്തുപൊട്ട്, മേരിക്കുണ്ടൊരു കുഞ്ഞാട്, സ്പാനിഷ് മസാല, സൌണ്ട് തോമ എന്നിവയാണ് ബെന്നി പി നായരമ്പലം തിരക്കഥയെഴുതിയ ദിലീപ് ചിത്രങ്ങള്‍.
