രേണുക വേണു|
Last Modified ശനി, 16 നവം‌ബര്‍ 2024 (11:02 IST)
Mohanlal: സമീപകാലത്ത് തുടര്‍ പരാജയങ്ങളും മോശം സിനിമാ സെലക്ഷനും കാരണം ഒരുപാട് ട്രോള്‍ ചെയ്യപ്പെട്ട നടനാണ് സൂപ്പര്‍താരം മോഹന്‍ലാല്‍. സെലക്ടീവ് അല്ലാത്തതിനാല്‍ ആണ് സിനിമകള്‍ മോശമാകുന്നതെന്നും പുതിയ സംവിധായകര്‍ക്കു ഡേറ്റ് കൊടുക്കാന്‍ ലാല്‍ തയ്യാറാകണമെന്നും വിമര്‍ശനങ്ങള്‍ ഉയര്‍ന്നിരുന്നു. അതിനെല്ലാമുള്ള മറുപടിയായിരിക്കും ഇനി വരാനിരിക്കുന്ന മോഹന്‍ലാല്‍ സിനിമകള്‍. മലയാളത്തിലെ എണ്ണംപറഞ്ഞ മികച്ച സംവിധായകര്‍ക്കൊപ്പമാണ് മോഹന്‍ലാല്‍ ഒന്നിക്കാന്‍ പോകുന്നത്.
ലൂസിഫറിന്റെ തുടര്‍ച്ചയായി പൃഥ്വിരാജ് സുകുമാരന്‍ സംവിധാനം ചെയ്യുന്ന 'എംപുരാന്‍' ആണ് വരാനിരിക്കുന്ന മോഹന്‍ലാല്‍ ചിത്രങ്ങളില്‍ ഏറ്റവും വലിയ പ്രൊജക്ട്. മോഹന്‍ലാലിനൊപ്പം പൃഥ്വിരാജ്, ഇന്ദ്രജിത്ത്, ടൊവിനോ തോമസ് എന്നിവരും ഈ സിനിമയില്‍ ശ്രദ്ധേയമായ വേഷങ്ങള്‍ അവതരിപ്പിച്ചിരിക്കുന്നു. ലൂസിഫറിലെ പോലെ മോഹന്‍ലാല്‍ ആരാധകര്‍ക്ക് ആഘോഷിക്കാനുള്ള എല്ലാ മാസ് ചേരുവകളും എംപുരാനിലും ഉണ്ടാകും. അടുത്ത വര്‍ഷം ഏപ്രിലില്‍ ചിത്രം തിയറ്ററുകളിലെത്തും.
തരുണ്‍ മൂര്‍ത്തി ചിത്രത്തിലാണ് മോഹന്‍ലാല്‍ അവസാനമായി അഭിനയിച്ചത്. ഏറെകാലത്തിനു ശേഷം വിന്റേജ് മോഹന്‍ലാലിനെ സ്‌ക്രീന്‍ കാണാമെന്ന പ്രതീക്ഷയിലാണ് ആരാധകര്‍ തരുണ്‍ മൂര്‍ത്തി ചിത്രത്തിനായി കാത്തിരിക്കുന്നത്. 'തുടരും' എന്നാണ് സിനിമയുടെ പേര്. ഫാമിലി ഡ്രാമ ഴോണറിലുള്ള ചിത്രത്തില്‍ മോഹന്‍ലാല്‍ ടാക്‌സി ഡ്രൈവര്‍ ആയി അഭിനയിക്കുന്നു. ഓപ്പറേഷന്‍ ജാവ, സൗദി വെള്ളക്ക എന്നീ സിനിമകളിലൂടെ ശ്രദ്ധേയനായ സംവിധായകനാണ് തരുണ്‍ മൂര്‍ത്തി.
രോമാഞ്ചം, ആവേശം എന്നീ സൂപ്പര്‍ഹിറ്റ് സിനിമകള്‍ക്കു ശേഷം ജിത്തു മാധവ് സംവിധാനം ചെയ്യുന്ന സിനിമയില്‍ മോഹന്‍ലാല്‍ നായകനാകുമെന്നാണ് ഇപ്പോള്‍ പുറത്തുവരുന്ന റിപ്പോര്‍ട്ട്. മോഹന്‍ലാല്‍ ആദ്യമായി സംവിധാനം ചെയ്യുന്ന ബറോസ് ഡിസംബര്‍ 25 നു തിയറ്ററുകളിലെത്തും. അതിനുശേഷമായിരിക്കും ജിത്തു മാധവ് - മോഹന്‍ലാല്‍ ചിത്രത്തിന്റെ ഔദ്യോഗിക പ്രഖ്യാപനം. ആശീര്‍വാദ് സിനിമാസ് ആയിരിക്കും ഈ ചിത്രം നിര്‍മിക്കുകയെന്നും റിപ്പോര്‍ട്ടുകളുണ്ട്.
കൃഷാന്ത് ചിത്രത്തിലും മോഹന്‍ലാല്‍ അഭിനയിക്കുമെന്നാണ് വിവരം. ആവാസവ്യൂഹം, പുരുഷപ്രേതം എന്നീ സിനിമകളിലൂടെ ശ്രദ്ധേയനായ കൃഷാന്ത് ഒരുക്കുന്ന ഇന്‍വസ്റ്റിഗേഷന്‍ ത്രില്ലറില്‍ ഡിറ്റക്ടീവ് ആയാകും മോഹന്‍ലാല്‍ അഭിനയിക്കുകയെന്നും സൂചനകളുണ്ട്. ഈ സിനിമയുടെ ഔദ്യോഗിക പ്രഖ്യാപനവും ഉടനുണ്ടാകും.
മഹേഷ് നാരായണന്‍ സംവിധാനം ചെയ്യുന്ന മമ്മൂട്ടി ചിത്രത്തിലാണ് മോഹന്‍ലാല്‍ ഇപ്പോള്‍ അഭിനയിക്കുന്നത്. ഇതില്‍ എക്സ്റ്റന്റഡ് കാമിയോ റോള്‍ ആണ് ലാലിനുള്ളത്. ശ്രീലങ്കയിലാണ് താരം ഇപ്പോള്‍. മമ്മൂട്ടിയുമായുള്ള കോംബിനേഷന്‍ സീനുകള്‍ അടക്കം ലങ്കയില്‍ ചിത്രീകരിക്കും. അതിനുശേഷം കേരളത്തിലേക്ക് മടങ്ങിയെത്തുന്ന ലാല്‍ സത്യന്‍ അന്തിക്കാട് സംവിധാനം ചെയ്യുന്ന കുടുംബ ചിത്രത്തിലാകും അഭിനയിക്കുക. അന്‍വര്‍ റഷീദുമായി ഒരു പ്രൊജക്ടില്‍ ചര്‍ച്ചകള്‍ നടക്കുന്നുണ്ടെങ്കിലും ഇക്കാര്യത്തില്‍ തീരുമാനമായിട്ടില്ല.
