ബിഗ് ബോസ് മലയാളം ആറാം സീസണ്‍ മോഹന്‍ലാലിനെയും സുരേഷ് മേനോനെയും സംബന്ധിച്ചിടത്തോളം ഏറെ പ്രത്യേകതയുള്ളതാണ്. പഴയ സൗഹൃദം പുതുക്കാനുള്ള അവസരം. ഭ്രമരം എന്ന ഒറ്റ സിനിമയിലൂടെ മലയാളി പ്രേക്ഷകരുടെ മനസ്സില്‍ ഇപ്പോഴും നിറഞ്ഞുനില്‍ക്കുന്ന താരമാണ് സുരേഷ് മേനോന്‍. ഇദ്ദേഹം ബിബി ആറിന്റെ മത്സരാര്‍ത്ഥിയായി എത്തുമ്പോള്‍ പഴയ ഭ്രമരത്തിലെ സുഹൃത്തുക്കളായ ശിവന്‍കുട്ടിയും ഉണ്ണികൃഷ്ണനും വര്‍ഷങ്ങള്‍ക്കിപ്പുറം വീണ്ടും ഒന്നിക്കുന്നതാണ് പ്രേക്ഷകര്‍ കണ്ടത്.

മോഹന്‍ലാലിനൊപ്പം തന്നെ പ്രാധാന്യമുള്ള കഥാപാത്രമായിരുന്നു ഭ്രമരത്തില്‍ സുരേഷ് അവതരിപ്പിച്ചത്. 15 വര്‍ഷങ്ങള്‍ക്ക് ശേഷമാണ് നമ്മള്‍ കാണുന്നതെന്ന് മോഹന്‍ലാല്‍ സുരേഷിനെ ക്ഷണിച്ചുകൊണ്ട് പറഞ്ഞു.'എത്ര പഠിച്ചിട്ടും ഒരു മാസ്റ്ററിന്റെ കൂടെ ജോലി ചെയ്തത് പോലെയായിരുന്നു നിങ്ങള്‍ക്കൊപ്പം പ്രവര്‍ത്തിച്ചത്. ഒരിക്കല്‍ക്കൂടി നിങ്ങളെ കാണുമ്പോള്‍ സന്തോഷം മാത്രമേ ഉള്ളൂ',-എന്നാണ് സുരേഷ് പറഞ്ഞത്. പാലക്കാട് വേരുകളുള്ള സുരേഷ് മുംബൈ മലയാളിയാണ്. ഭ്രമരം മാത്രമല്ല അറുപതോളം ചിത്രങ്ങളില്‍ അദ്ദേഹം അഭിനയിച്ചിട്ടുണ്ട്. കൂടുതലും ഹിന്ദി സിനിമകളാണ്. രണ്ട് ഇംഗ്ലീഷ് സിനിമകളും രണ്ട് മറാഠി ചിത്രങ്ങളിലും വേഷമിട്ടു.

ബിഗ് ബോസ് വീട്ടിനകത്തേക്ക് കയറാന്‍ തനിക്ക് പേടിയുണ്ടെന്നും സുഹൃത്തുക്കളോട് സംസാരിക്കാതെ ഫോണ്‍ ഇല്ലാതെ 100 ദിവസം ഇവിടെ കഴിയാന്‍ പേടി തോന്നുന്നു എന്നാണ് സുരേഷ് പറഞ്ഞത്.