വി.കെ.പ്രകാശ് സംവിധാനം ചെയ്ത 'പാലും പഴവും' ബോക്‌സ്ഓഫീസില്‍ വന്‍ പരാജയം. മീര ജാസ്മിന്‍, അശ്വിന്‍ ജോസ് എന്നിവര്‍ കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്ന ചിത്രം ഓഗസ്റ്റ് 23 നാണ് തിയറ്ററുകളിലെത്തിയത്. റിലീസ് ചെയ്തു ഒരാഴ്ച പിന്നിടുമ്പോള്‍ ചിത്രത്തിന്റെ വേള്‍ഡ് വൈഡ് ബോക്‌സ്ഓഫീസ് കളക്ഷന്‍ വെറും 50 ലക്ഷം മാത്രമാണ്. ഓഗസ്റ്റ് 29 വ്യാഴാഴ്ച കേരളത്തില്‍ നിന്ന് രണ്ട് ലക്ഷമാണ് ചിത്രം കളക്ട് ചെയ്തത്.

23 കാരനായ സുനില്‍ എന്ന ചെറുപ്പക്കാരനും 33 കാരിയായ സുമി എന്ന സ്ത്രീയും അവിചാരിതമായി കണ്ടുമുട്ടുന്നതും പിന്നീട് ഇരുവരുടെയും ജീവിതത്തില്‍ സംഭവിക്കുന്ന കാര്യങ്ങളുമാണ് സിനിമയുടെ പ്രമേയം. ശാന്തി കൃഷ്ണ, അശോകന്‍, മണിയന്‍പിള്ള രാജു, നിഷ സാംരഗ്, രചന നാരായണന്‍കുട്ടി, ഷിനു ശ്യാമളന്‍ തുടങ്ങിയവരും ചിത്രത്തില്‍ അഭിനയിച്ചിട്ടുണ്ട്.

നീണ്ട ഇടവേളയ്ക്കു ശേഷമുള്ള മീര ജാസ്മിന്റെ തിരിച്ചുവരവില്‍ ഒരു സിനിമയും മികച്ച വിജയം കണ്ടിട്ടില്ല. സത്യന്‍ അന്തിക്കാട് ചിത്രം മകള്‍ ആണ് രണ്ടാം വരവില്‍ മീര കേന്ദ്ര കഥാപാത്രത്തെ അവതരിപ്പിച്ച ആദ്യ സിനിമ. പിന്നീട് മലയാളത്തില്‍ ക്വീന്‍ എലിസബത്ത് എന്ന ചിത്രത്തിലും അഭിനയിച്ചു. ഇത് രണ്ടും പരാജയമായിരുന്നു.