ദുൽഖർ സൽമാൻ നായകനായപ്പോൾ മലയാളികൾ അന്വേഷിച്ചത് മറ്റൊരു താരപുത്രനെയായിരുന്നു. രാജാവിന്റെ മകനെ. പ്രണവ് മോഹൻലാൽ. താരങ്ങളുടെ മക്കൾ ഓരോരുത്തരായി സിനിമയിലേക്ക് അരങ്ങേറ്റം കുറിക്കുമ്പോൾ ഏവരും ഒരുപോലെ കാത്തിരുന്നത് പ്രണവിനെയായിരുന്നു. ഇന്ന് വരും വാളെ വരും എന്ന് കരുതി ആരാധകർ കാത്തിരുന്നു.

ആരാധകരുടെ ചോദ്യങ്ങൾക്ക് വിരാമമിട്ട് പ്രണവ് മോഹൻലാൽ നായകനായി വെള്ളിത്തിരയിലേക്ക് വരുന്നു. മോഹൻലാൽ ആണ് ഇക്കാര്യം ഫേസ്ബുക്കിലൂടെ അറിയിച്ചത്. ജീത്തു ജോസഫ് സംവിധാനം ചെയ്യുന്ന ചിത്രത്തിലൂടെയാണ് പ്രണവ് നായകനായി വരുന്നത്. ആന്റണി പെരുമ്പാവൂർ ആണ് ചിത്രം നിർമിക്കുന്നത്. ദൃശ്യം എന്ന മെഗാഹിറ്റ് ചിത്രത്തിന് ശേഷം ആശിർവാദ് സിനിമാസിന്റെ ബാനറിൽ പുറത്തിറങ്ങുന്ന ത്രില്ലർ മൂവിയാണ് ഇതെന്നും മോഹൻലാൽ വ്യക്തമാക്കുന്നു.

ക്യാമറയ്ക്ക് പിന്നിൽ നിൽക്കാനായിരുന്നു ഇത്രയും നാൾ പ്രണവ് തീരുമാനിച്ചിരുന്നത്.ജീത്തു ജോസഫ് സംവിധാനം ചെയ്ത പാപനാശം, ലൈഫ് ഓഫ് ജോസൂട്ടി എന്നീ ചിത്രങ്ങളിൽ പ്രണവ് സഹസംവിധായകനായി പ്രവർത്തിച്ചിട്ടുണ്ട്.