13 വർഷത്തിലധികമായി സിനിമകൾ ചെയ്യുന്നുവെങ്കിലും ഇതുവരെ തന്റെ ഒരു സിനിമ പോലും 100 കോടി നേടിയിട്ടില്ലെന് ദുൽഖർ സൽമാൻ. ഏറെ ഹിറ്റായ സീതാരാമൻ, കുറുപ്പ് എന്നീ ചിത്രങ്ങൾ 100 കോടിക്കടുത്ത് എത്തിയിരുന്നു. എന്നാൽ, 100 കോടി ക്ലബ്ബിൽ കയറാൻ സിനിമകൾക്ക് ആയില്ല. സീതാരാമം 91 കോടിയാണ് നേടിയത്. കുറുപ്പ് 81 കോടിയും. ഏറ്റവും പുതിയ ചിത്രമായ ലക്കി ഭാസ്കർ 100 കോടി ക്ലബിൽ കയറുമെന്നാണ് താൻ കരുതുന്നതെന്നും ദുൽഖർ പറഞ്ഞു.

40 തിലധികം സിനിമകൾ ചെയ്തിട്ടുണ്ടെങ്കിലും തനിക്ക് ഇതുവരെ 100 കോടി ക്ലബ്ബിൽ ഇടം പിടിക്കാൻ കഴിഞ്ഞിട്ടില്ലെന്ന് ദുൽഖർ പറഞ്ഞു. ലക്കി ഭാസ്കർ 100 കോടി നേടുമോ എന്ന റാണയുടെ ചോദ്യത്തിന് മറുപടി നൽകുകയായിരുന്നു ദുൽഖർ. ചിത്രത്തിന്റെ നിർമാതാവ് ആദ്യദിനം തന്നെ നൂറ് കോടി നേടിയ 'ഗുണ്ടൂർ കാരം' എടുത്ത ആളാണെന്നും ലക്കി ഭാസ്കർ തന്റെ കരിയറിലെ ആദ്യത്തെ നൂറ് കോടി ചിത്രമാകുമെന്നും ദുൽഖർ വ്യക്തമാക്കി. ഏതൊരു നടനെയും പോലെ നൂറ് കോടി തന്റെയും സ്വപ്നമാണെന്നും ദുൽഖർ വ്യക്തമാക്കി.

അതേസമയം, ഇന്നലെ റിലീസ് ആയ ലക്കി ഭാസ്കറിന് വൻ സ്വീകരണമാണ് ലഭിക്കുന്നത്. കേരളത്തിലും റിലീസ് ദിനത്തിൽ വലിയ പ്രതികരണമാണ് സിനിമയ്ക്ക് ലഭിച്ചത്. പ്രീമിയർ ഷോയിലും സോഷ്യൽ മീഡിയയിലും മികച്ച അഭിപ്രായം നേടിയതോടെ ആദ്യദിനത്തിൽ കേരളത്തിൽ സിനിമയുടെ സ്‌ക്രീൻ കൗണ്ട് ഉയർത്തിയിരുന്നു. കേരളത്തിൽ 175 സ്‌ക്രീനുകളിലായിരുനു സിനിമ റിലീസ് ചെയ്തിരുന്നത്. ഇത് 207 ആയി ഉയർത്തി.