നിവിൻ പോളി നായകനാകുന്ന തുറമുഖത്തിന് ശേഷം രാജീവ് രവി സംവിധാനം ചെയ്യുന്ന ചിത്രത്തിൽ ആസിഫ് അലി നായകൻ. യഥാര്‍ത്ഥ സംഭവകഥയെ ആസ്പദമാക്കികൊണ്ടാണ് സംവിധായകന്‍ പുതിയ ചിത്രമൊരുക്കുന്നതെന്ന് റിപ്പോർട്ടുകൾ.

തൊണ്ടി മുതലും ദൃക്‌സാക്ഷിയും എന്ന ചിത്രത്തിലൂടെ ശ്രദ്ധേയനായ സിബി തോമസാണ് സിനിമയ്ക്കു വേണ്ടി തിരക്കഥ എഴുതുന്നത്. തൊണ്ടി മുതലില്‍ പോലീസ് ഓഫീസറായി തിളങ്ങിയ നടനാണ് സിബി തോമസ്. ഒരു ഇന്‍വെസ്റ്റിഗേറ്റീവ് സ്‌റ്റോറി ആയിരിക്കും രാജീവ് രവി ചിത്രമെന്നാണ് സൂചന.

കാത്തിരിപ്പിനൊടുവിൽ രാജീവ് രവിയുടെ ചിത്രത്തിൽ താൻ നായകനാകുന്നുവെന്ന് ആസിഫ് അലി ഫേസ്ബുക്കിലൂടെ തന്റെ ആരാധകരെ അറിയിച്ചിരുന്നു. ഫിലിം റോള്‍ പ്രൊഡക്ഷന്‍സിന്റെ ബാനറില്‍ അരുണ്‍കുമാര്‍ വി ആറാണ് ചിത്രം നിര്‍മ്മിക്കുന്നത്.

നിലവിൽ തുറമുഖത്തിന്റെ ഷൂട്ടിംഗ് തിരക്കിലാണ് രാജീവ് രവി. നിവിന്‍ പോളി നായകവേഷത്തില്‍ എത്തുന്ന ചിത്രത്തില്‍ ബിജു മേനോന്‍, നിമിഷ സജയന്‍, ഇന്ദ്രജിത്ത് സുകുമാരന്‍, പൂര്‍ണിമ ഇന്ദ്രജിത്ത്, അര്‍ജുന്‍ അശോകന്‍,മ ണികണ്ഠന്‍ ആചാരി തുടങ്ങിയവരും അഭിനയിക്കുന്നുണ്ട്.