സജിത്ത്|
Last Modified ബുധന്‍, 21 ജൂണ്‍ 2017 (14:18 IST)
മികച്ച നടിക്കുള്ള സംസ്ഥാന അവാര്‍ഡ് ലഭിച്ചതിനെ തുടര്‍ന്ന് അഹങ്കാരിയായി മാറി എന്ന് പറയുന്നവര്‍ക്ക് ചുട്ട മറുപടിയുമായി നടി രജിഷ വിജയന്‍. ഒരു സിനിമാക്കാരന്‍ എന്ന സിനിമയുടെ ഷൂട്ടിങ് ലൊക്കേഷനില്‍ വച്ചാണ് അവാര്‍ഡ് കിട്ടിയ വിവരം അറിഞ്ഞത്. വളരെയേറേ സന്തോഷ തോന്നി. ലൊക്കേഷനില്‍ കേക്ക് മുറിച്ച് ആഘോഷിക്കുകയും ചെയ്തു. ജീവിതത്തില്‍ എന്നും ഓര്‍ക്കുന്ന ഒരു ദിനമാണതെന്നും രജിഷ പറയുന്നു.
സ്ഥിരമായി എല്ലാവരും പറയുന്നതുപോലെയല്ല, ഞാന്‍ ഈ അവാര്‍ഡ് ഒട്ടും പ്രതീക്ഷിച്ചിരുന്നില്ല. അതിന് ഒരുപാട് കാരണങ്ങളുമുണ്ടായിരുന്നു. എന്റെ ആദ്യത്തെ സിനിമയാണത്. വളരെ ഗൗരവമുള്ള കഥാപാത്രങ്ങള്‍ക്ക് അവാര്‍ഡ് കിട്ടിയ ചരിത്രമാണുള്ളത്. അനുരാഗ കരിക്കിന്‍വെള്ളം ജൂറിക്ക് അയച്ചിട്ടുണ്ടെന്നു പോലും അറിയില്ലായിരുന്നുവെന്നും രജിഷ പറയുന്നു
അവാര്‍ഡ് ഒരിക്കലും എന്റെ തലയില്‍ കയറാന്‍ അനുവദിച്ചിട്ടില്ല. അതിനെക്കുറിച്ച് ചിന്തിച്ചാല്‍ പിന്നെ അതില്‍ തന്നെയായിരിക്കും ജീവിതം. അവാര്‍ഡ് ഒരു സംഭവമാണെങ്കില്‍പോലും ഞാന്‍ ഒരു വ്യത്യസ്തമായ മേഖല തിരഞ്ഞെടുത്തു അതിനു കിട്ടിയ സൂചന മാത്രമായിട്ടാണിതിനെ കാണുന്നത്. ഇനിയും നല്ല കഥാപാത്രങ്ങള്‍ ചെയ്യാനുള്ള പ്രചോദനമാണ് എനിക്ക് കിട്ടിയ അവാര്‍ഡെന്നും അവര്‍ പറഞ്ഞു.
