ലൈംഗികബന്ധത്തിനായി ശല്യം ചെയ്‌ത യുവാവിന്റെ ജനനേന്ദ്രിയം യുവതി ഛേദിച്ചു. താനെയിലെ നന്ദീവാലിയില്‍ ചൊവ്വാഴ്ച രാത്രിയാണ് സംഭവം. ഗുരുതരമായി പരുക്കേറ്റ യുവാവിനെ ആശുപത്രിയില്‍ പ്രവേശിപ്പിച്ചു. സംഭവത്തില്‍ യുവതിയേയും ഇവരുടെ സുഹൃത്തായ രണ്ടു പേരെയും പൊലീസ് അറസ്‌റ്റ് ചെയ്‌തു.

തേജസ് മഹാത്രേ, പ്രവീണ്‍ കെനിയ എന്നിവരാണ് യുവതിക്കൊപ്പം അറസ്‌റ്റിലായത്.

സമീപവാസിയായ യുവാവ് ലൈംഗികാവശ്യം ഉന്നയിച്ച് ദീര്‍ഘകാലമായി യുവതിയെ ശല്യം ചെയ്‌തിരുന്നു. ഇയാളുടെ പെരുമാറ്റം സഹിക്കാന്‍ കഴിയാതെ വന്നതോടെയാണ് സുഹൃത്തുക്കളുടെ സഹായത്തോടെ കൃത്യം നടത്താന്‍ യുവതി തീരുമാനിച്ചത്.

ചൊവ്വാഴ്ച രാത്രിയില്‍ ഗ്രാമത്തിലെ ആളൊഴിഞ്ഞ പ്രദേശത്തേക്ക് യുവാവിനെ യുവതി വിളിച്ചുവരുത്തി. തുടര്‍ന്ന് തേജസും പ്രവീണും ചേര്‍ന്ന് ഇയാളെ മര്‍ദ്ദിച്ച് അവശനാക്കി. തുടര്‍ന്ന് ഇവരുടെ സഹായത്തോടെ യുവതി തന്നെ യുവാവിന്റെ ലൈംഗികാവയവം മുറിച്ചുമാറ്റുകയയിരുന്നു.

ഗുരുതരാവസ്ഥയിലായ യുവാവിനെ നാട്ടുകാരാണ് ദോംബിവാലിയിലെ ഒരു ആശുപത്രിയില്‍ എത്തിച്ചത്. സംഭവത്തില്‍ അന്വേഷണം നടന്നുവരുകയാണെന്ന് പൊലീസ് വ്യക്തമാക്കി.