അമ്മയോടൊപ്പം ഉറങ്ങിക്കിടന്ന നാലുവയസുകാരിയെ തട്ടിക്കൊണ്ടുപോകാൻ ശ്രമിച്ചയാൾ പിടിയിൽ. ചൊവ്വാഴ്ച രാത്രി ലുധിയാനയിലാണ് സംഭവം ഉണ്ടയത്. കുട്ടിയെ എടുക്കുന്നതിനിടയിൽ അമ്മ ഞെട്ടി ഉണർന്നതോടെയാന് ശ്രമം പരാജയപ്പെട്ടത് സംഭവത്തിൽ പ്രതിയെ പൊലീസ് അറസ്റ്റ് ചെയ്തു. പ്രതി കുട്ടിയെ തട്ടിയെടുക്കുന്നതിന്റെ സിസിടിവി ദൃശ്യങ്ങൾ ഇപ്പോൾ സാമൂഹ്യ മാധ്യമങ്ങൾ വഴി പ്രചരിക്കുന്നുണ്ട്.

വീടിന് പുറത്ത് കട്ടിലിൽ ഉറങ്ങുകയായിരുന്നു അമ്മയും കുഞ്ഞും. ഇതിനിടയിൽ സാധനങ്ങൾ കൊണ്ടുപോകുന്ന സൈക്കിൾ റിക്ഷയിൽ എത്തിയ ആൾ കുഞ്ഞിനെ അമ്മയുടെ സമീപത്തുനിന്നും എടുക്കുകയായിരുന്നു. ഇതോടെ കുട്ടിയുടെ അമ്മയും കൂടുയുണ്ടായിരുന്ന ബന്ധുവായ സ്ത്രീയും ഞെട്ടി ഉണർന്നു. പിടിക്കപ്പെടുമെന്ന് ഉറപ്പായതോടെ പ്രതി സൈക്കിൾ റിക്ഷയിൽ രക്ഷപ്പെടുകയായിരുന്നു.

എന്നാൽ പ്രതി അധികം ദൂരം താണ്ടുന്നതിന് മുൻപ് തന്നെ സമീപവാസികൾ പിടികൂടി. നാട്ടുകാർ പ്രതിയെ പിന്നീട് പൊലീസിൽ ഏൽപ്പിക്കുകയായിരുന്നു. മുൻനിശ്ചയ പ്രകാരമാന് കുട്ടിയെ തട്ടിക്കൊണ്ടുപോകാൻ പ്രതി എത്തിയത് എന്നും എല്ലാവരും ഉറങ്ങി എന്ന് ഉറപ്പുവരുത്തിയതിന് ശേഷമാണ് പ്രതി കുഞ്ഞിനെ തട്ടിയെടുക്കാൻ ശ്രമിച്ചത് എന്നും പൊലീസ് വ്യക്തമാക്കി. പ്രതിയെ പൊലീസ് ചോദ്യം ചെയ്ത് വരികയാണ്.