ഏകദിന ക്രിക്കറ്റിലെ അരങ്ങേറ്റ മത്സരത്തില്‍ തന്നെ 150 റണ്‍സ് നേടുന്ന ആദ്യ താരമായി ദക്ഷിണാഫ്രിക്കന്‍ ഓപ്പണര്‍ മാത്യു ബ്രീട്‌സ്‌കെ. ത്രിരാഷ്ട്ര പരമ്പരയില്‍ ന്യൂസിലന്‍ഡിനെതിരായ മത്സരത്തിലായിരുന്നു ബ്രിട്‌സ്‌കെയുടെ 150 റണ്‍സ് പ്രകടനം. ലാഹോര്‍ ഗദ്ദാഫി സ്റ്റേഡിയത്തില്‍ ടോസ് നഷ്ടപ്പെട്ട് ബാറ്റിംഗിനെത്തിയ ദക്ഷിണാഫ്രിക്ക ബ്രീട്‌സ്‌കെയുടെ സെഞ്ചുറികരുത്തില്‍ നിശ്ചിത ഓവറില്‍ 6 വിക്കറ്റ് നഷ്ടത്തില്‍ 304 റണ്‍സാണ് നേടിയത്. 34 റണ്‍സുമായി വിയാന്‍ മള്‍ഡറും 41 റണ്‍സുമായി ജേസണ്‍ സ്മിത്തും ഭേദപ്പെട്ട പ്രകടനമാണ് നടത്തിയത്.

അരങ്ങേറ്റ ഏകദിനത്തില്‍ ഒരു താരം സ്വന്തമാക്കുന്ന ഏറ്റവും ഉയര്‍ന്ന സ്‌കോറാണിത്. മുന്‍ വെസ്റ്റിന്‍ഡീസ് താരം ഡെസ്മണ്ട് ഹെയ്‌നസിന്റെ 148 റണ്‍സിന്റെ റെക്കോര്‍ഡാണ് താരം തകര്‍ത്തത്. 148 പന്തിലാണ് ബ്രിട്‌സ്‌കെ 150 റണ്‍സ് അടിച്ചെടുത്തത്. 26 കാരനായ താരം 2018ലെ അണ്ടര്‍ 19 ലോകകപ്പിനുള്ള ദക്ഷിണാഫ്രിക്കന്‍ ടീമില്‍ ഭാഗമായിരുന്നു. ടൂര്‍ണമെന്റില്‍ ഏറ്റവും കൂടുതല്‍ റണ്‍സ് നേടിയ രണ്ടാമത്തെ ദക്ഷിണാഫ്രിക്കന്‍ താരം ബ്രിട്‌സ്‌കെ ആയിരുന്നു. ആഭ്യന്തര ക്രിക്കറ്റില്‍ മികച്ച പ്രകടനങ്ങള്‍ നടത്തിയതിനെ തുടര്‍ന്ന് 2023ല്‍ ദക്ഷിണാഫ്രിക്കയുടെ ടി20 ടീമില്‍ താരം ഇടം നേടിയിരുന്നു.എന്നാല്‍ കാര്യമായ പ്രകടനങ്ങള്‍ നടത്താന്‍ താരത്തിനായിരുന്നില്ല.

എന്നാല്‍ ഏകദിന ക്രിക്കറ്റിലെ മികച്ച പ്രകടനത്തോടെ ശ്രദ്ധ നേടാന്‍ താരത്തിനായി. അതേസമയം 2025ലെ ഐപിഎല്‍ സീസണില്‍ ലഖ്‌നൗ താരം കൂടിയാണ് ബ്രിട്‌സ്‌കെ. 57 ലക്ഷം രൂപയ്ക്കാണ് താരത്തെ ലഖ്‌നൗ താരലേലത്തില്‍ സ്വന്തമാക്കിയത്.