അഭിറാം മനോഹർ|
Last Modified തിങ്കള്‍, 13 നവം‌ബര്‍ 2023 (15:24 IST)
ഐസിസിയുടെ ഹാള്‍ ഓഫ് ഫെയിമില്‍ ഇടം നേടി ഇന്ത്യയുടെ മുന്‍ ഓപ്പണറും ഇതിഹാസതാരവുമായ വിരേന്ദര്‍ സെവാഗ്. മുന്‍ ശ്രീലങ്കന്‍ സൂപ്പര്‍ ഓള്‍ റൗണ്ടറും ലോകകപ്പ് ഹീറോയുമായ അരവിന്ദ ഡിസില്‍വയും സെവാഗിനൊപ്പം പട്ടികയില്‍ ഇടം നേടി. മുന്‍ ഇന്ത്യന്‍ വനിതാ ടീം ക്യാപ്റ്റനായ ഡയാന എഡുല്‍ജിയും ഹാള്‍ ഓഫ് ഫെയിമില്‍ ഇടം നേടി. ലിസ്റ്റില്‍ ഇടം നേടുന്ന ആദ്യ വനിതാ താരമാണ് ഡയാന എഡുല്‍ജി.
ഐസിസിയുടെ ഹാള്‍ ഓഫ് ഫെയിമില്‍ ഇടം പിടിക്കുന്ന എട്ടാമത്തെ ഇന്ത്യന്‍ പുരുഷ താരമാണ് സെവാഗ്. സുനില്‍ ഗവാസ്‌കര്‍, ബിഷന്‍ സിങ് ബേദി,കപില്‍ ദേവ്,അനില്‍ കുംബ്ലെ,സച്ചിന്‍ ടെന്‍ഡുല്‍ക്കര്‍,വിനു മങ്കാദ്,രാഹുല്‍ ദ്രാവിഡ് എന്നിവരാണ് ഇതിന് മുന്‍പ് ഐസിസിയുടെ ഹാള്‍ ഓഫ് ഫെയിമില്‍ ഇടം നേടിയ താരങ്ങള്‍. ബാറ്റിംഗ് ശൈലിയിലൂടെ ഇന്ത്യന്‍ ക്രിക്കറ്റില്‍ വിപ്ലവം തീര്‍ത്ത ബാറ്ററാണ് സെവാഗ്. ടെസ്റ്റില്‍ ഇന്ത്യയ്ക്കായി 2 തവണ ട്രിപ്പിള്‍ സെഞ്ചുറി സ്വന്തമാക്കിയ ആദ്യ താരം സെവാഗാണ്. ഏകദിനത്തില്‍ ഇരട്ട സെഞ്ചുറിയും താരം നേടിയിട്ടുണ്ട്. 2007, 2011 വര്‍ഷങ്ങളിലെ ഇന്ത്യയുടെ ലോകകപ്പ് വിജയങ്ങളിലും താരം ഭാഗമായിരുന്നു.
