ഓസ്ട്രേലിയക്കെതിരായ ബോർഡർ ഗവാസ്കർ ടെസ്റ്റ് പരമ്പര ആദ്യ രണ്ട് ടെസ്റ്റിലെ ഉജ്ജ്വല വിജയത്തോടെ ഇന്ത്യ സ്വന്തമാക്കിയിരുന്നു. സമ്പൂർണ്ണമായ ആധിപത്യത്തോടെയായിരുന്നു രണ്ട് ടെസ്റ്റിലെയും ഇന്ത്യൻ വിജയങ്ങൾ. 4 മത്സരങ്ങളടങ്ങിയ പരമ്പര തൂത്തുവാരാനാകും ഇന്ത്യ ശ്രമിക്കുക. മൂന്നാം ടെസ്റ്റ് മത്സരം കൂടി വിജയിക്കാനായാൽ വമ്പൻ റെക്കോർഡാണ് ഇന്ത്യൻ നായകനെ കാത്തിരിക്കുന്നത്.

ഓസീസിനെതിരായ അടുത്ത മത്സരം കൂടി വിജയിക്കാനായാൽ നായകനെന്ന നിലയിൽ ആദ്യ 5 ടെസ്റ്റ് മത്സരങ്ങളിൽ വിജയിക്കുന്ന ആദ്യ ക്യാപ്റ്റൻ എന്ന റെക്കോർഡ് രോഹിത്തിന് സ്വന്തമാകും. കഴിഞ്ഞ 50 വർഷത്തിനിടെ 3 നായകന്മാർ മാത്രമാണ് തങ്ങളുടെ ആദ്യ നാല് ടെസ്റ്റിലും വിജയിച്ചിട്ടുള്ളത്. മുൻ ഇന്ത്യൻ നായകൻ എം എസ് ധോനി, പാക് നായകൻ ബാബർ അസം എന്നിവരാണ് രോഹിത്തിന് മുൻപെ ഈ നേട്ടം സ്വന്തമാക്കിയിട്ടുള്ളത്. അടുത്ത ടെസ്റ്റ് മത്സരം കൂടി വിജയിക്കാനായാൽ ഈ റെക്കോർഡ് തകർക്കാൻ രോഹിത്തിനാകും.

ശ്രീലങ്കക്കെതിരായ ടെസ്റ്റ് പരമ്പരയിലായിരുന്നു രോഹിത് ആദ്യം നായകനായത്. രോഹിത്തിൻ്റെ നായകത്വത്തിൽ 2 ടെസ്റ്റുകളിൽ ഇന്ത്യ ശ്രീലങ്കക്കെതിരെ വിജയം കണ്ടു. പരിക്ക് മൂലം മാറി നിന്നിരുന്ന താരം ഓസീസിനെതിരായ ടെസ്റ്റ് പരമ്പരയിലാണ് ടീമിൽ മടങ്ങിയെത്തിയത്. പരമ്പരയിലെ ആദ്യ 2 ടെസ്റ്റുകളിൽ ഇന്ത്യ വിജയിക്കുകയും ചെയ്തു.