അനുകൂല സാഹചര്യങ്ങളിൽ തോൽപിക്കാൻ പ്രയാസമുള്ള ടീമാണ് ഇന്ത്യയെന്ന് ഓഫ് സ്പിന്നർ ആർ അശ്വിൻ. ഏറ്റവും മികച്ച ടീമാണ് ഇന്ത്യ. ഞങ്ങളുടേതായ ദിവസം, അനുകൂല സാഹചര്യങ്ങളിൽ ഇന്ത്യയെ തോൽപിക്കാൻ പ്രയാസമാണ്– ബി സി സി ഐ ടി വിയുമായുള്ള അഭിമുഖത്തിലാണ് അശ്വിൻ ഇക്കാര്യം വ്യക്തമാക്കിയത്.

കൊൽക്കത്തയില്‍ നടന്ന മത്സരത്തില്‍ പാക്കിസ്ഥാനെതിരായ വിജയത്തെക്കുറിച്ച് ചോദിച്ചപ്പോളായിരുന്നു ഈ മറുപടി. എന്നാൽ, ചില കളികളില്‍ വ്യത്യാസങ്ങളുണ്ടാകാറുണ്ട്. ശ്രീലങ്കയ്ക്ക് എതിരെ പൂനെയിലും നാഗ്പൂരിൽ ന്യൂസീലൻഡിന് എതിരെയും നടന്ന കളികളില്‍ നമ്മള്‍ തോറ്റിരുന്നു. അനുകൂല സാഹചര്യമല്ലായിരുന്നോ എന്നു ചോദിച്ചാൽ വ്യത്യസ്താഭിപ്രായമുണ്ട്. ഈ രണ്ട് മത്സരത്തിലും ഇന്ത്യയുടെ കളി എതിരാളികൾ നന്നായി പഠിച്ചെടുത്തു. നമ്മൾ തോറ്റു – അശ്വിൻ വ്യക്തമാക്കി. പാക്കിസ്ഥാനെതിരെ ജയിക്കാൻ ഈ‍ഡൻ ഗാർഡൻസിലെ കുതിർന്ന പിച്ചും ടോസും സഹായകമായെന്നും അശ്വിൻ കൂട്ടിച്ചേര്‍ത്തു.