അഭിറാം മനോഹർ|
Last Modified ബുധന്‍, 21 ഓഗസ്റ്റ് 2024 (15:09 IST)
ബംഗ്ലാദേശിനെതിരായ ടെസ്റ്റ് പരമ്പര ആരംഭിക്കാനിരിക്കെ ഇന്ത്യന്‍ ടെസ്റ്റ് ടീമില്‍ ആരെല്ലാം ഉള്‍പ്പെടുമെന്നതിനെ പറ്റിയുള്ള ചര്‍ച്ചകള്‍ കൊഴുക്കുന്നു. റിഷഭ് പന്ത് ടീമില്‍ തിരിച്ചെത്തിയതോടെ ടെസ്റ്റ് ടീമില്‍ പന്ത് തന്നെയാകും വിക്കറ്റ് കീപ്പറെന്നത് ഉറപ്പാണ്. ഇഷാന്‍ കിഷന്‍ ആദ്യന്തര ക്രിക്കറ്റില്‍ തിരിച്ചെത്തിയതോടെ ബാക്കപ്പ് വിക്കറ്റ് കീപ്പര്‍ സ്ഥാനത്തിനായി ധ്രുവ് ജുറല്‍,ഇഷാന്‍ കിഷന്‍ എന്നിവര്‍ തമ്മിലാകും മത്സരം നടക്കുക.
പരിക്കില്‍ നിന്നും മടങ്ങിയെത്തിയ റിഷഭ് പന്ത് ടി20 ലോകകപ്പില്‍ തരക്കേടില്ലാത്ത പ്രകടനമായിരുന്നു നടത്തിയത്. ടെസ്റ്റില്‍ ഇന്ത്യയിലും പുറത്തും മികച്ച റെക്കോര്‍ഡാണ് താരത്തിനുള്ളത്. ഇത് പന്തിന് ടീമില്‍ സ്ഥാനം നിലനിര്‍ത്താന്‍ സഹായിക്കും. പന്തിന്റെ വരവോടെ ധ്രുവ് ജുറലിനാകും ടീമില്‍ സ്ഥാനം നഷ്ടമാവുക. വിക്കറ്റ് കീപ്പര്‍ എന്ന നിലയില്‍ പരിഗണിക്കപ്പെടാന്‍ സാധ്യതയില്ലെങ്കിലും കെ എല്‍ രാഹുല്‍ ഇന്ത്യന്‍ ടെസ്റ്റ് ടീമില്‍ തിരിച്ചെത്തിയേക്കും. ചേതേശ്വര്‍ പുജാര,അജിങ്ക്യ രഹാനെ എന്നിവര്‍ പരിഗണനയിലില്ലാത്ത സാഹചര്യത്തില്‍ ശ്രേയസ് അയ്യരും ടെസ്റ്റ് ടീമില്‍ മടങ്ങിയെത്താന്‍ സാധ്യത അധികമാണ്.
