സൂര്യകുമാര്‍ യാദവിന്റെ നേതൃത്വത്തില്‍ ശ്രീലങ്കയെ ടി20യില്‍ പരമ്പരയില്‍ അടിയറവ് പറയിച്ചതിന് പിന്നാലെ അടുത്ത ദൗത്യവുമായി ഇന്ത്യന്‍ സംഘം. രോഹിത് ശര്‍മയും വിരാട് കോലിയും അടങ്ങുന്ന ഏകദിന പരമ്പരയ്ക്കുള്ള ടീം കൊളംബോയിലുള്ള ഇന്ത്യന്‍ സംഘത്തിനൊപ്പം ചേര്‍ന്നു. ഗൗതം ഗംഭീര്‍ പരിശീലകനായതിന് ശേഷം കോലി ആദ്യമായി ഇന്ത്യന്‍ സംഘത്തില്‍ ചേര്‍ന്നത് ആഘോഷമാക്കിയിരിക്കുകയാണ് ഇന്ത്യന്‍ ആരാധകര്‍.
കൊളംബോയില്‍ പരിശീലനത്തിനിടെയിലുള്ള കോലിയുടെയും ഗംഭീറിന്റെയും ചിത്രങ്ങള്‍ ബിസിസിഐ തന്നെയാണ് ഔദ്യോഗിക ഹാന്‍ഡിലിലൂടെ പുറത്തുവിട്ടത്. ചിത്രം പുറത്തുവന്നതും സമൂഹമാധ്യമങ്ങളില്‍ ഇത് വൈറലായി. ഐപിഎല്ലില്‍ ഗംഭീറും കോലിയും തമ്മിലുണ്ടായ വാക്തര്‍ക്കമെല്ലാം നേരത്തെ മാധ്യമങ്ങളില്‍ നിറഞ്ഞുനിന്നതിനാല്‍ തന്നെ കൗതുകത്തോടെയാണ് പുതിയ ചിത്രങ്ങളെ ആരാധകര്‍ കാണൂന്നത്.
കളിക്കളത്തില്‍ വിവിധ ടീമുകളുടെ ഭാഗമായി പരസ്പരം പോരടിച്ചിട്ടുണ്ടെങ്കിലും ഇന്ത്യന്‍ ടീമിന്റെ ജേഴ്‌സിക്ക് കീഴില്‍ ഇരുവരും ഒരുമയോടെ തന്നെ പ്രവര്‍ത്തിക്കുമെന്നും ഇന്ത്യയ്ക്കായി മത്സരങ്ങള്‍ വിജയിപ്പിക്കാന്‍ ശ്രമിക്കുമെന്നും ഗംഭീര്‍ നേരത്തെ വ്യക്തമാക്കിയിരുന്നു. ഓഗസ്റ്റ് 2നാണ് 3 മത്സരങ്ങളടങ്ങിയ ഏകദിന പരമ്പരയിലെ ആദ്യ മത്സരം നടക്കുന്നത്. രോഹിത്,കോലി എന്നിവര്‍ക്കൊപ്പം കെ എല്‍ രാഹുല്‍,ശ്രേയസ് അയ്യര്‍ എന്നിവരും ചെറിയ ഇടവേളയ്ക്ക് ശേഷം ടീമില്‍ തിരിച്ചെത്തിയിട്ടുണ്ട്. 2025ലെ ചാമ്പ്യന്‍സ് ട്രോഫി മുന്നില്‍ കണ്ടുകൊണ്ട് ശക്തമായ തയ്യാറെടുപ്പാണ് ഇന്ത്യ നടത്തുന്നത്.
