വെസ്‌റ്റ് ഇന്‍ഡീസിനെതിരായ ഒന്നാം ടെസ്റില്‍ ഓസ്‌ട്രേലിയ്‌ക്ക് തകര്‍പ്പന്‍ ജയം. രണ്ടാം ഇന്നിംഗ്‌സില്‍ 47 റണ്‍സിന്റെ വിജയലക്ഷ്യവുമായിറങ്ങിയ ഓസീസ് ഡേവിഡ് വാര്‍ണറുടെ (28) വിക്കറ്റ് നഷ്ടത്തില്‍ ലക്ഷ്യത്തിലെത്തി. ഷോണ്‍ മാര്‍ഷ്(13), സ്റീവന്‍ സ്മിത്ത്(5) എന്നിവര്‍ ഓസീസിനെ ജയത്തിലേക്ക് എത്തിക്കുകയായിരുന്നു. സെഞ്ചുറി നേടിയ അരങ്ങേറ്റക്കാരന്‍ ആഡം വോഗ്സ് (130) ആണു കളിയിലെ കേമന്‍. സ്കോര്‍: വെസ്റ്റ് ഇന്‍ഡീസ് ഒന്നാം ഇന്നിംഗ്സ് -148, രണ്ടാം ഇന്നിംഗ്സ്- 216. ഓസ്ട്രേലിയ ഒന്നാം ഇന്നിംഗ്സ് 318, രണ്ടാം ഇന്നിംഗ്സ്-47/1.

മൂന്നാം ദിനം 25/2 എന്ന നിലയില്‍ രണ്ടാം ഇന്നിംഗ്സ് പുനരാരംഭിച്ച വെസ്റ്റ് ഇന്‍ഡീസിന്റെ സ്കോര്‍ 216 റണ്‍സില്‍ എത്തിയപ്പോള്‍ അവസാന വിക്കറ്റു നിലംപതിച്ചു. അര്‍ധ സെഞ്ചുറിയുമായി മര്‍ലോണ്‍ സാമുവല്‍സും(74), ഷെയ്ന്‍ ഡോവ്റിച്ചും(70) മാത്രമാണ് ഓസീസ് ബൌളിംഗിനെ അല്പമെങ്കിലും പ്രതിരോധിച്ചത്.