മണിരത്നം സംവിധാനം ചെയ്യുന്ന അടുത്ത ചിത്രത്തില്‍ ധനുഷ് നായകനാകും. ഇതൊരു ക്രൈം ത്രില്ലറായിരിക്കുമെന്നാണ് സൂചനകള്‍. തമിഴിലും ഹിന്ദിയിലുമായി ചിത്രം പുറത്തിറങ്ങും. എ ആര്‍ റഹ്‌മാനാണ് സംഗീതം.

ധനുഷിന്‍റെ നിലവിലെ കമ്മിറ്റ്മെന്‍റ് മാറാന്‍ കാത്തിരിക്കുകയാണ് മണിരത്നം. ചിത്രത്തിന്‍റെ തിരക്കഥ നേരത്തേതന്നെ പൂര്‍ത്തിയായിട്ടുണ്ട്. ഓകെ കണ്‍‌മണിക്ക് മുമ്പേ എഴുതിയ തിരക്കഥയാണ് ഈ ചിത്രത്തിന്‍റേത് എന്നാണ് അറിയാന്‍ കഴിയുന്നത്.

ധനുഷിന്‍റെ പുതിയ ചിത്രമായ ‘മാരി’യുടെ കിടിലന്‍ ടീസര്‍ തമിഴകത്ത് തരംഗമായിരിക്കുകയാണ്. ഒരു ഹോളിവുഡ് ചിത്രത്തില്‍ ധനുഷ് നായകനാകുന്നു എന്ന വാര്‍ത്തയും വന്നിരിക്കുന്നു. വേലൈയില്ലാ പട്ടധാരി ഒരുക്കിയ വേല്‍‌രാജിന്‍റെയും ദേശീയ പുരസ്കാര ജേതാവായ വെട്രിമാരന്‍റെയും സിനിമകള്‍ ധനുഷിനെ കാത്തിരിക്കുകയാണ്. അതിനിടെയാണ് മണിരത്നം പ്രൊജക്ടും ധനുഷിന്‍റെ തേടി എത്തിയിരിക്കുന്നത്.

മണിരത്നം ചിത്രത്തില്‍ നായികയെയോ മറ്റ് സാങ്കേതിക വിദഗ്ധരെയോ തീരുമാനിച്ചിട്ടില്ല. സന്തോഷ് ശിവന്‍ ഈ പ്രൊജക്ടിന് ക്യാമറ ചലിപ്പിക്കുമെന്ന് റിപ്പോര്‍ട്ടുകളുണ്ട്.