നടന് പൃഥ്വിരാജ് ആദ്യമായി ഒരു കോമഡിചിത്രവുമായി എത്തുകയാണ്. ദീപു കരുണാകരന്‍ സംവിധാനം ചെയ്യുന്ന തേജാ ഭായ് ആന്‍ഡ് ഫാമിലിയിലൂടെയാണ് പൃഥ്വി പ്രേക്ഷകരെ ചിരിപ്പിക്കാനെത്തുന്നത്. ഉടന്‍ പ്രദര്‍ശനത്തിനെത്തുന്ന ഈ ചിത്രത്തിലൂടെ കുടുംബപ്രേക്ഷകരുടെ മനസ്സില്‍ സ്ഥാനം നേടിക്കൊടുക്കാമെന്ന പ്രതീക്ഷയിലാണ് പൃഥ്വിരാജ്.
ഹീറോ ഇമേജുള്ള ഗൌരവമേറിയ വേഷങ്ങളാണ് പൃഥ്വിക്ക് മുമ്പ് അധികവും ലഭിച്ചിരുന്നത്. കമലിന്റെ സ്വപ്നക്കൂടിലും ഷാഫിയുടെ ചോക്ലേറ്റിലുമാണ് പൃഥ്വിക്ക് കുറച്ചെങ്കിലും കോമഡി അവതരിപ്പിക്കാനുണ്ടായിരുന്നത്. കുടുംബപ്രേക്ഷകര്‍ക്കിടയില്‍ സ്വീകാര്യത ലഭിക്കണമെങ്കില്‍ കോമഡിചിത്രങ്ങളും ആവശ്യമാണെന്ന് അടുത്തവൃത്തങ്ങള്‍ ഉപദേശിച്ചതിനെ തുടര്‍ന്നാണ് പൃഥ്വി ഇപ്പോള്‍ തേജാ ഭായിയിലൂടെ ഭാഗ്യം പരീക്ഷിക്കാനിറങ്ങിയിരിക്കുന്നത്.
ചിത്രത്തിന്റെ ആദ്യപകുതിയില്‍ കോമഡി ട്രാക്കിലാണ് കഥ പുരോഗമിക്കുന്നതെങ്കിലും രണ്ടാം പകുതിയില്‍ നായകപരിവേഷവും പൃഥ്വിയുടെ കഥാപാത്രത്തിന് കൈവരുന്നുണ്ട്. അഖിലയാണ് തേജാഭായിലെ നായിക. നെടുമുടി വേണു, സലീം കുമാര്‍, ജഗതി, അശോകന്‍, ഇന്ദ്രന്സ്, ജഗദീഷ്, സുരാജ് വെഞ്ഞാറമൂട് എന്നിവരും ചിത്രത്തില്‍ അഭിനയിക്കുന്നു.
