ലൈംഗിക അതിക്രമ ആരോപണങ്ങളില്‍ സത്യാവസ്ഥ പുറത്തുവരണമെന്ന് നടി വിന്‍സി അലോഷ്യസ്. സിനിമയില്‍ തനിക്ക് വിവേചനം നേരിട്ടിട്ടുണ്ടെന്ന് വിന്‍സി പറഞ്ഞു. കരാര്‍ ഇല്ലാതെ ജോലി ചെയ്യേണ്ടി വന്നിട്ടുണ്ട്. പറഞ്ഞ വേതനം ലഭിക്കാതിരുന്നിട്ടുണ്ട്. അത് ചോദ്യം ചെയ്യാന്‍ ബുദ്ധിമുട്ട് നേരിട്ടിട്ടുണ്ട്. ഹേമ കമ്മിറ്റി റിപ്പോര്‍ട്ടിനു ശേഷം ധൈര്യം ലഭിച്ചുവെന്നും താരം പറഞ്ഞു. സിനിമയില്‍ തനിക്ക് ലൈംഗിക അധിക്ഷേപം നേരിട്ടിട്ടില്ലെന്നും താരം പറഞ്ഞു.

സിനിമയില്‍ പവര്‍ ഗ്രൂപ്പ് അനുഭവപ്പെട്ടിട്ടില്ല. എന്നാല്‍ ഒരു ആധിപത്യം ഉള്ളതായി തോന്നിയിട്ടുണ്ട്. ആധിപത്യം കാണിക്കുന്നവരുടെ പേരുകള്‍ പറയാന്‍ ആഗ്രഹിക്കുന്നില്ല. തന്നെ കുറിച്ച് ഇല്ലാത്ത കഥകള്‍ പറയുന്നതും ശ്രദ്ധയില്‍പ്പെട്ടിട്ടുണ്ടെന്നും വിന്‍സി പറഞ്ഞു.

2019 ല്‍ വികൃതി എന്ന സിനിമയിലൂടെയാണ് വിന്‍സി മലയാളത്തില്‍ അരങ്ങേറിയത്. കനകം കാമിനി കലഹം, ഭീമന്റെ വഴി, ജന ഗണ മന, സോളമന്റെ തേനീച്ചകള്‍, സൗദി വെള്ളക്ക, രേഖ, പദ്മിനി എന്നിവയാണ് വിന്‍സിയുടെ മറ്റു ശ്രദ്ധേയമായ സിനിമകള്‍.