ജോര്‍ജി സാം|
Last Modified ബുധന്‍, 26 ഫെബ്രുവരി 2020 (16:52 IST)
തമിഴ് ചലച്ചിത്രലോകത്തിന്‍റെ ദളപതി വിജയ് ഇപ്പോള്‍ മാസ്റ്റര്‍ എന്ന സിനിമയുടെ ചിത്രീകരണത്തിരക്കിലാണ്. ഏപ്രില്‍ മാസത്തിലാണ് മാസ്റ്റര്‍ റിലീസ് പ്രഖ്യാപിച്ചിരിക്കുന്നത്. ഈ തിരക്കുകള്‍ക്കിടെ തന്നെ വിജയുടെ അടുത്ത ചിത്രം ആര് സംവിധാനം ചെയ്യുമെന്നതിനെ സംബന്ധിച്ച് അഭ്യൂഹങ്ങള്‍ പരക്കുന്നുണ്ട്.
വെട്രിമാരന്‍, സുധാ കൊംഗാറ, മഗിഴ് തിരുമേനി എന്നിവരില്‍ ഒരാളായിരിക്കും ‘ദളപതി 65’ ഒരുക്കുക എന്നാണ് റിപ്പോര്‍ട്ടുകള്‍ വന്നത്. അതില്‍ തന്നെ സുധാ കൊംഗാറയ്‌ക്ക് മുന്‍‌തൂക്കമുണ്ടെന്നും വിവരമുണ്ടായിരുന്നു. എന്നാല്‍ പുതിയ റിപ്പോര്‍ട്ടുകള്‍ പ്രകാരം, വിജയ് വീണ്ടും ‘മാസ്റ്റര്‍’ ഒരുക്കുന്ന ലോകേഷ് കനകരാജിന് ഡേറ്റ് നല്‍കിയിരിക്കുന്നു.
മാസ്റ്റര്‍ കഴിഞ്ഞാലുടന്‍ തന്നെ ലോകേഷ് തന്‍റെ അടുത്ത വിജയ് ചിത്രം ആരംഭിക്കുമോ എന്ന് ഉറപ്പായിട്ടില്ല. എന്നാല്‍ ലോകേഷിന്‍റെ പക്കല്‍ പൂര്‍ണമായ തിരക്കഥകള്‍ പലതുള്ളതിനാല്‍ ഉടന്‍ തന്നെ ഒരു വിജയ് ചിത്രം തുടങ്ങുന്നതിന് ബുദ്ധിമുട്ടുകള്‍ ഉണ്ടാവില്ലെന്നാണ് വിലയിരുത്തല്‍.
ഡ്രീം വാരിയര്‍ പിക്‍ചേഴ്സാണ് ദളപതി 65 ഒരുക്കുന്നത്. ലോകേഷ് തന്നെയാണ് സംവിധായകനെങ്കില്‍ ആ ചിത്രത്തിന് സാം സി എസ് ആയിരിക്കും സംഗീതം ഒരുക്കുക എന്നും അറിയുന്നു.
