ഇന്ത്യന്‍ സിനിമ ഈ വര്‍ഷം ഏറ്റവുമധികം കാത്തുനിന്ന പ്രഭാസിന്റെ ബ്രഹ്മാണ്ഡ സിനിമയായ കല്‍കിയ്ക്ക് വമ്പന്‍ വരവേല്‍പ്പ്. മഹാഭാരത കാലത്ത് നിന്നും ആരംഭിച്ചുകൊണ്ട് കഥ പറയുന്ന സയന്‍സ് ഫിക്ഷന്‍ ത്രില്ലര്‍ ഒരുക്കിയിരിക്കുന്നത് നാഗ് അശ്വിനാണ്. പ്രഭാസിനൊപ്പം കമല്‍ഹാസന്‍,അമിതാഭ് ബച്ചന്‍,ദീപിക പദുക്കോണ്‍ തുടങ്ങി വമ്പന്‍ താരനിരയാണുള്ളത്. സന്തോഷ് നാരായണനാണ് സംഗീതസംവിധാനം. സിനിമ പുറത്തിറങ്ങിയപ്പോള്‍ പ്രതീക്ഷിച്ച കളക്ഷന് മുകളിലാണ് ആദ്യ ദിനം സിനിമയ്ക്ക് ലഭിക്കുന്നത്.

ആദ്യ ഷോയ്ക്ക് മുന്‍പ് തന്നെ സിനിമയുടെ 40 ലക്ഷം ടിക്കറ്റുകള്‍ വിറ്റുപോയിരുന്നു. ഈ ഇനത്തില്‍ ആദ്യ ദിനം തന്നെ 55 കോടി രൂപ സിനിമ കളക്ട് ചെയ്തിരുന്നു. ആദ്യ ഷോ പിന്നിടുമ്പോള്‍ തന്നെ 30 കോടി രൂപ സിനിമ ബോക്‌സോഫീസില്‍ നിന്നും നേടികഴിഞ്ഞു. ആദ്യപ്രതികരണങ്ങള്‍ കഴിയുമ്പോള്‍ മികച്ച അഭിപ്രായമാണ് സിനിമയ്ക്ക് ലഭിക്കുന്നത് എന്നതിനാല്‍ ഇന്ന് ഇനിയുള്ള ഷോകള്‍ക്കും മികച്ച തിരക്കുണ്ടാകുമെന്ന് ഉറപ്പാണ്. ആഗോള ബോക്‌സോഫീസില്‍ നിന്നും ആദ്യദിനം സിനിമ 200 കോടി കളക്ട് ചെയ്യുമെന്നാണ് ട്രാക്കര്‍മാര്‍ പറയുന്നത്. വടക്കേ അമേരിക്കയില്‍ രാജമൗലി സിനിമയായ ആര്‍ആര്‍ആര്‍ ആദ്യ ദിനം നേടിയ റെക്കോര്‍ഡ് മറികടന്നിരുന്നു.