ലോകേഷ് കനകരാജിൻ്റെ സംവിധാനത്തിൽ ഒടുവിൽ പുറത്തിറങ്ങിയ ചിത്രമായ വിക്രം തമിഴ്‌നാട്ടിൽ മാത്രമല്ല തെന്നിന്ത്യയിൽ തന്നെ വലിയ ആവേശം സൃഷ്ടിച്ച സിനിമയാണ്. കമൽ ഹാസനും ഫഹദും വിജയ് സേതുപതിയും കളം നിറഞ്ഞഭിനയിച്ച ചിത്രത്തിൽ കാമിയോ റോളിൽ റോളക്സ് എന്ന കഥാപാത്രത്തെ സൂര്യയും അവതരിപ്പിച്ചിരുന്നു.

സിനിമയുടെ അവസാന മിനിട്ടുകളിൽ മാത്രമെ ഉള്ളുവെങ്കിലും റോളക്സ് എന്ന കഥാപാത്രത്തിന് വലിയ ശ്രദ്ധയാണ് ലഭിച്ചത്. എന്നാൽ റോളക്സ് എന്ന കഥാപാത്രത്തിനായി ലോകേഷ് ആദ്യം സമീപിച്ചത് സൂപ്പർ താരമായ വിക്രമിനെയായിരുന്നുവെന്ന റിപ്പോർട്ടുകളാണ് പുറത്തുവരുന്നത്. ചെറിയ കഥാപാത്രമായതിനാലാണ് വിക്രം ആ വേഷം ഉപേക്ഷിച്ചതെന്നാണ് റിപ്പോർട്ട്.

ഇതിന് പുറമെ ദളപതി 67 എന്ന സിനിമയിലേക്കും വിക്രമിനെ ലോകേഷ് ക്ഷണിച്ചതായാണ് റിപ്പോർട്ട്. എന്നാൽ ഈ വേഷവും താരം ഉപേക്ഷിച്ചു. ദിവസങ്ങൾക്കുള്ളിൽ ലോകേഷ് കനകരാജ് ചിത്രമായ ദളപതി 67ൻ്റെ വിശദാംശങ്ങൾ പുറത്തുവിടുമെന്ന് ലോകേഷ് നേരത്തെ പ്രഖ്യാപിച്ചിരുന്നു.