എം ടി വാസുദേവന്‍ നായരുടെ കഥകളെ ആസ്പദമാക്കി ഒരുക്കുന്ന ആന്തോളജി സിനിമകളിലെ രഞ്ജിത്- മമ്മൂട്ടി സെഗ്മെന്റായ കടുഗണ്ണാവയുടെ ഗ്ലിമ്പ്‌സ് പുറത്ത്. മലയാളികളുടെ പ്രിയപ്പെട്ട കൂട്ടുക്കെട്ടായ രഞ്ജിത്തും മമ്മൂട്ടിയും 6 വര്‍ഷങ്ങള്‍ക്ക് ശേഷമാണ് വീണ്ടും ഒന്നിക്കുന്നത്. ബ്ലാക്ക്,കയ്യൊപ്പ്,പാലേരി മാണിക്യം തുടങ്ങി ഒട്ടനേകം സിനിമകളില്‍ മമ്മൂട്ടി- രഞ്ജിത് ഒന്നിച്ചിട്ടുണ്ട്. പുത്തന്‍ പണം എന്ന സിനിമയിലാണ് അവസാനം ഇരുവരും ഒന്നിച്ചത്.

എം ടിയുടെ കടുഗണ്ണാവ: ഒരു യാത്രാക്കുറിപ്പ് എന്ന കഥയിലാണ് മമ്മൂട്ടി കേന്ദ്രകഥാപാത്രത്തെ അവതരിപ്പിക്കുന്നത്. ശ്രീലങ്കയില്‍ ജോലി ചെയ്തിരുന്ന അച്ഛന് മറ്റൊരു ബന്ധത്തിലുണ്ടായ മകള്‍ എന്ന് കരുതപ്പെടുന്ന പെണ്‍കുട്ടിയെ പറ്റി ഒരു മുതിര്‍ന്ന പത്രവര്‍ത്തകന്റെ ഓര്‍മയാണ് കടുഗണ്ണാവ. മൊത്തം 9 ചെറുകഥകളെ ആസ്പദമാക്കി 9 ചിത്രങ്ങളാണ് ആന്തോളജിയിലുള്ളത്. ഇതിലെ 2 ചിത്രങ്ങള്‍ പ്രിയദര്‍ശനാണ് സംവിധാനം ചെയ്യുന്നത്. ശ്യാമപ്രസാദ്,അശ്വതി വി നായര്‍,മഹേഷ് നാരായണന്‍,ജയരാജ്,സന്തോഷ് ശിവന്‍,രതീഷ് അമ്പാട്ട് എന്നിവരാണ് ആന്തോളജിയിലെ മറ്റ് ചിത്രങ്ങള്‍ സംവിധാനം ചെയ്തിരിക്കുന്നത്.

ഫഹദ് ഫാസില്‍,പാര്‍വതി തിരുവോത്ത്,ബിജു മേനോന്‍,ആസിഫ് അലി,നദിയ മോയ്തു,നടുമുടി വേണു,സിദ്ദിഖ്,ഇന്ദ്രജിത്ത് സുകുമാരന്‍,അപര്‍ണ ബാലമുരളി തുടങ്ങി വലിയ താരനിര തന്നെ ആന്തോളജിയില്‍ അണിനിരക്കുന്നു.