പ്രേക്ഷകരുടെ പ്രിയപ്പെട്ട ബാലുവും നീലുവും സിനിമയിലും, റിലീസ് ഉടൻ
വെബ്‌ദുനിയ ലേഖകൻ|
Last Modified വ്യാഴം, 5 മാര്‍ച്ച് 2020 (16:47 IST)
ടെലിവിഷന്‍ പ്രേക്ഷകരുടെ ഇഷ്ട കഥാപാത്രങ്ങളാണ് ബാലുവും നീലുവും. ഉപ്പും മുളകും എന്ന പരിപാടിയിലൂടെ പ്രേക്ഷകരുടെ മനസ് കീഴടക്കിയ ബിജു സോപാനവും നിഷ സാരംഗും കേന്ദ്ര കഥാപാത്രങ്ങളായി സിനിമ എത്തുന്നു. നവാഗതനായ ആഷാദ് ശിവരാമനാണ് ചിത്രം സംവിധാനം ചെയ്യുന്നത്. ലെയ്‌ക എന്നാണ് ഇരുവരും ഒന്നിക്കുന്ന ചിത്രത്തിന്റെ പേര്. സിനിമ ഉടൻ റിലീസിനെത്തും
ഒരു വര്‍ക് ഷോപ്പ് ജീവനക്കാരനായ രാജുവിന്റെ കുടുംബത്തിന്റെ കഥയാണ് സിനിമ പറയുക. ബഹിരാകാശ ഗവേഷണ കേന്ദ്രത്തിലെ ശാസ്ത്രജ്ഞനാണെന്ന് സ്വയം അവകാശപ്പെടുന്ന രാജുവായാണ് ബിജു സോപാനം സിനിമയിൽ വേഷമിടുന്നത്. രാജുവിന്റെ ഭാര്യ വിമലയായി നിഷ സാരംഗും എത്തും. ടിങ്കു എന്ന നായയാണ് ചിത്രത്തില്‍ മറ്റൊരു പ്രധാന കഥാപാത്രം.
ലെയ്‌ക്ക എന്നാണ് ഈ നായയ്ക്ക് രാജു നല്‍കിയിരിക്കുന്ന പേര്. ആദ്യമായി ബഹിരാകാശത്തുപോയ റഷ്യന്‍ നായയാണ് 'ലെയ്‌ക്ക'. ഈ നായയുടെ പിന്‍മുറക്കാരനാണ് ഈ ലെയ്‌ക്ക എന്നാണ് രാജുവിന്റെ അവകാശവാദം. തമിഴ് നടന്‍ നാസര്‍, ബൈജു സന്തോഷ്, സുധീഷ്, വിജിലേഷ്, നോബി, പ്രവീണ, അരിസ്റ്റോ സുരേഷ്, സിബി തോമസ്, സേതുലക്ഷ്മി, രോഷ്‌നി, നന്ദന വര്‍മ തുടങ്ങിയവരും സിനിമയിലെ മറ്റു കഥാപാത്രങ്ങളായി എത്തും
