അഭിറാം മനോഹർ|
Last Modified ചൊവ്വ, 23 ജൂലൈ 2024 (19:37 IST)
ജിയോ സിനിമയില്‍ സ്ട്രീം ചെയ്യുന്ന റിയാലിറ്റി ഷോയായ ബിഗ്‌ബോസ് ഹിന്ദി ഷോയ്‌ക്കെതിരെ മഹാരാഷ്ട്ര ഭരണകക്ഷിയായ ശീവസേന ഏക്‌നാഥ് ഷിന്‍ഡെ വിഭാഗം. ഹിന്ദി ബിഗ്‌ബോസ് ഷോയിലെ മത്സരാര്‍ഥികള്‍ക്കിടയിലുണ്ടായ കിടപ്പറ രംഗങ്ങള്‍ സംപ്രേക്ഷണം ചെയ്തതോടെയാണ് ഷോയ്ക്കും അതിന്റെ നിര്‍മാതാക്കള്‍ക്കുമെതിരെ പരാതിയുമായി ശിവസേനയുടെ മുതിര്‍ന്ന എംഎല്‍എ മനീഷ കയാണ്ഡെ രംഗത്ത് വന്നത്. തിങ്കളാഴ്ച മുംബൈ പോലീസില്‍ ഇവര്‍ പരാതി നല്‍കി.
റിയാലിറ്റി ടിവി ഷോ എന്ന പേരില്‍ കാണിക്കുന്നത് അശ്ലീലമാണെന്നും അതിനാല്‍ തന്നെ ഷോയുടെ സംപ്രേക്ഷണം നിര്‍ത്തിവെയ്ക്കണമെന്നും കമ്മീഷണര്‍ വിവേക് ഫല്‍സാല്‍ക്കറിന് സമര്‍പ്പിച്ച പരാതിയില്‍ ശിവസേന എംഎല്‍എ ആവശ്യപ്പെട്ടു. റിയാലിറ്റി ഷോയെന്ന പേരില്‍ അശ്ലീലതയുടെ എല്ലാ പരിധികളും ലംഘിക്കപ്പെട്ടു. റിയാലിറ്റി ഷോയെന്ന പേരില്‍ അശ്ലീല കാഴ്ചകള്‍ പരസ്യമായി കാണിക്കുന്നത് യുവജനങ്ങളെ സ്വാധീനിക്കുമെന്നും വനിതാ എംഎല്‍എയായ മനീഷ കയാണ്ഡെ മാധ്യമങ്ങളോട് പറഞ്ഞു.
ജൂലൈ 18ന് സംപ്രേക്ഷണം ചെയ്ത എപ്പിസോഡില്‍ ബിഗ് ബോസ് മത്സരാര്‍ഥികളായ കൃതിക മാലിക്കിന്റെയും അര്‍മാന്‍ മാലിക്കിന്റെയും കിടപ്പറ ദൃശ്യങ്ങള്‍ കാണിച്ചതായാണ് എംഎല്‍എയുടെ പരാതി. അര്‍മാന്‍ മാലിക്കും കൃതിക മാലിക്കും എല്ലാ പരിധികളും ലംഘിച്ചുവെന്നും ഈ രംഗങ്ങള്‍ സംപ്രേക്ഷണം ചെയ്തഹില്‍ അഭിനേതാക്കളെയും ഷോയുടെ സിഇഒയെയും അറസ്റ്റ് ചെയ്യണമെന്നുമാണ് ശിവസേന എംഎല്‍എ പരാതിയില്‍ പറയുന്നത്.
പ്രമുഖ യൂട്യൂബറായ അര്‍മാന്‍ മാലിക്കിന് 2 ഭാര്യമാരാണുള്ളത്. ആദ്യ ഭാര്യയായ പായല്‍ മാലിക്കും രണ്ടാം ഭാര്യയായ കൃതിക മാലിക്കും പുതിയ ബിഗ്‌ബോസ് സീസണില്‍ ഭാഗമാണ്. ആദ്യ ഭാര്യയായ പായല്‍ മാലിക് ഷോയില്‍ നിന്നും പുറത്തായിരുന്നു. ഇതിനിടെയാണ് കൃതികയുടെയും അര്‍മാന്‍ മാലിക്കിന്റെയും രംഗങ്ങള്‍ പുറത്തുവന്നത്. ഇതിന് പിന്നാലെ തനിക്കെതിരെ വിമര്‍ശനങ്ങള്‍ കടുത്തുവെന്നും അര്‍മാനുമായുള്ള വിവാഹബന്ധം വേര്‍പെടുത്താന്‍ തീരുമാനിച്ചുവെന്നും പായല്‍ മാലിക് വ്യക്തമാക്കിയിരുന്നു. അതേസമയം ഇപ്പോള്‍ പ്രചരിക്കുന്ന വീഡിയോ ദൃശ്യങ്ങള്‍ വ്യാജമാണെന്നും ബഹുഭാര്യത്വത്തില്‍ ഏര്‍പ്പെടുന്നതിനെ പറ്റി വിമര്‍ശനങ്ങള്‍ കടുത്തതാണ് വിവാഹബന്ധം വേര്‍പെടുത്താനുള്ള തീരുമാനത്തിന് പിന്നിലെന്നും പായല്‍ പറഞ്ഞു.
