തെന്നിന്ത്യന്‍ സിനിമാപ്രേമികള്‍ ഒരിക്കലും മറക്കാത്ത നടിയാണ് സില്‍ക് സ്മിത. 80കളിലെയും 90 കളിലെയും യുവാക്കളുടെ ഹരമായിരുന്നുവെങ്കിലും ദുഖപൂര്‍ണ്ണമായ ജീവിതമാണ് സില്‍ക്ക് നയിച്ചിരുന്നത്. കുടുംബം കുട്ടികള്‍ എന്നിങ്ങനെ ഒരുപാട് ആഗ്രഹങ്ങളുണ്ടായിരുന്നെങ്കിലും സിനിമയുടെ വെള്ളിവെളിച്ചത്തില്‍ ഒതുങ്ങി തീരാനായിരുന്നു സില്‍ക്ക് സ്മിതയുടെ വിധി. ഇപ്പോഴിതാ സില്‍ക്ക് സ്മിതയ്‌ക്കൊപ്പമുള്ള അബുഭവങ്ങള്‍ പങ്കുവെച്ചിരിക്കുകയാണ് നടനും സംവിധായകനുമായ മധുപാല്‍.

സമകാലീകമലയാളത്തിന് നല്‍കിയ അഭിമുഖത്തിലാണ് മധുപാല്‍ മനസ്സുതുറന്നത്. ഒരു വല്ലാത്ത ജീവിതം ജീവിച്ച സ്ത്രീയായിരുന്നു അവര്‍. കൊച്ചുകുട്ടിയെപോലെ വിവാഹത്തെ കുറിച്ചും സിനിമയെ പറ്റിയും മക്കളെ പറ്റിയെല്ലാം സ്വപ്നങ്ങള്‍ അവര്‍ക്കുണ്ടായിരുന്നു. അവരുടെ ജീവിതത്തിലെ വലിയ ഒരു ആഗ്രഹമായിരുന്നു സിനിമയിലെങ്കിലും ഒരാള്‍ വിവാഹം ചെയ്യണമെന്നത്. ശരീരം ഉപയോഗിച്ചുകൊണ്ട് ഏറ്റവും കൂടുതല്‍ പണം വാങ്ങിക്കുന്ന നടിയായി മാറിയെങ്കിലും അവരില്‍ ഒരമ്മയുണ്ടായിരുന്നു.

അവരുടെ പെരുമാറ്റത്തിലൊക്കെ മനസ്സിലാക്കാന്‍ കഴിഞ്ഞത് അതാണ്. 100 ശതമാനവും ജെനുവിനായുള്ള സ്ത്രീയായിരുന്നു സില്‍ക്ക്. ഞാന്‍ വളരെ ആദരവോടും ബഹുമാനത്തോടെയുമാണ് അവരെ ഓര്‍ക്കുന്നത്. വ്യക്തിപരമായ ഒരുപാട് കാര്യങ്ങള്‍ അവര്‍ എന്നോട് പറഞ്ഞിട്ടുണ്ട്. പള്ളിവാതുക്കല്‍ തൊമ്മിച്ചന്‍ എന്ന സിനിമയിലാണ് ഞാന്‍ അവരെ വിവാഹം ചെയ്യുന്നത്. സീന്‍ കഴിഞ്ഞതും അവര്‍ എന്നോട് വന്ന് താങ്ക്‌സ് എല്ലാം പറഞ്ഞു. അവരുടെ മരണത്തെ പറ്റി ചികയുമ്പോള്‍ ഒരുപാട് അപരിചിതമായ കാര്യങ്ങളാകും കേള്‍ക്കേണ്ടി വരുന്നത്.

ആ സിനിമയുടെ ഷൂട്ടിന്റെ ഭാഗമായി എന്റെ കൂടെ അവര്‍ കുറച്ചു നാളുകള്‍ ഉണ്ടായിരുന്നു. സിനിമ കഴിഞ്ഞതിന് ശേഷം അവരെ കണ്ടിട്ടില്ല. സിനിമയുടെ റിലീസ് കഴിഞ്ഞ് അഞ്ചോ ആറോ മാസങ്ങള്‍ക്ക് ശേഷമാണ് അവര്‍ മരിക്കുന്നത്. മധുപാല്‍ പറഞ്ഞു.