മദ്ധ്യപ്രദേശില്‍ ഖണ്ഡവയ്ക്ക് 35 കിലോമീറ്റര്‍ അകലെ ആണ് പിപിലിയ എന്ന ഗ്രാമം. ഇവിടെയാണ് കബീറിന് സമകാലികനായ സിന്‍‌ഗാജി മഹാരാജ് എന്ന സന്യാസിവര്യന്‍റെ പേരിലുള്ള ക്ഷേത്രം സ്ഥിതി ചെയ്യുന്നത്.
ഗവ്‌ലി സമൂഹത്തില്‍ ജനിച്ച സിന്‍‌ഗാജി നിഷകളങ്കനും ലളിത ജീവിതം നയിച്ചിരുന്ന ആളുമായിരുന്നു. മന്‍‌രംഗ് സ്വാമിയുടെ പ്രബോധനങ്ങള്‍ കേള്‍ക്കാനിടയായതിനെ തുടര്‍ന്ന് ഇദ്ദേഹത്തിന് മനം മാറ്റം ഉണ്ടാവുകയും ആത്മീയ പാത സ്വീകരിക്കുകയുമായിരുന്നു.
ഈശ്വരാരാധനയില്‍ ‘നിര്‍ഗുണപാത’(അമൂര്‍ത്തമായ ഈശ്വരന്‍) സ്വീകരിക്കുകയാണ് സിന്‍‌ഗാജി മഹാരാജ് ചെയ്തത്. തീര്‍ത്ഥാടങ്ങളിലും വ്രതങ്ങളിലും അദ്ദേഹം വിശ്വസിച്ചിരുന്നില്ല. ഈശ്വരന്‍ മനുഷ്യന്‍റെ ഹൃദയത്തില്‍ തന്നെ ഉണ്ടെന്ന് സിന്‍‌ഗാജി മഹാരാജ് വിശ്വസിച്ചു. സ്വന്തം ആത്മാവിനെ അറിയുന്ന ഏത് മനുഷ്യനും തീര്‍ത്ഥാടനത്തിന്‍റെയും വ്രതം അനുഷ്ഠിക്കുന്നതിന്‍റെയും ഗുണം ലഭിക്കുമെന്ന വീക്ഷണമായിരുന്നു അദ്ദേഹത്തിന്‍റേത്. സാമൂഹ്യപ്രവര്‍ത്തനങ്ങളും അദ്ദേഹം നടത്തിയിരുന്നു.
ഒരിക്കല്‍ ഓംകാരേശ്വര ക്ഷേത്രം സന്ദര്‍ശിക്കാന്‍ അദേഹത്തിന് ക്ഷണമുണ്ടായി. എന്നാല്‍, എവിടെ ജലവും ശിലയുമുണ്ടോ അവിടെയൊക്കെ തീര്‍ത്ഥാടകന്‍ ഉണ്ടാകുമെന്നായിരുന്നു അദ്ദേഹം മറുപടി നല്‍കിയത്. ഇത് പറഞ്ഞ് ഗംഗയാണെന്ന് സങ്കല്പിച്ച് സമീപത്തുള്ള തോട്ടില്‍ അദ്ദേഹം മുങ്ങുകയും ചെയ്തു. അദ്ദേഹം ഒരു ക്ഷേത്രവും നിര്‍മ്മിക്കാന്‍ മുതിര്‍ന്നിട്ടുമില്ല.
ഫോട്ടോഗാലറി കാണാന്‍ ക്ലിക് ചെയ്യുക
|
അഭിപ്രായങ്ങളും പ്രതികരണങ്ങളും
സുഹൃത്തുക്കള്ക്ക് അയക്കൂ
ഈ പേജ് പ്രിന്‍റ് ചെയ്യൂ
