ആരവല്ലി പര്‍വ്വത നിരകളിലെ അരസുര്‍ മലയിലെ ഗബ്ബാര്‍ കുന്നുകളിലെ അംബാജി ക്ഷേത്രം ഉല്‍പ്പത്തിയെ കുറിച്ച് രേഖകളൊന്നും അവശേഷിപ്പിക്കാത്ത വിധം അതി പുരാതനമാണ്. ആര്യന്‍‌മാര്‍ക്ക് മുമ്പ് തന്നെ ആരാധനാ മൂര്‍ത്തിയായിരുന്ന അംബാജിയെ കാലക്രമേണ ആര്യന്‍‌മാരും ആരാധിക്കുകയായിരുന്നു എന്നാണ് കരുതുന്നത്. ഗബ്ബാര്‍ കുന്നുകളില്‍ അംബാദേവിയുടെ കാല്‍പ്പാടുകളും രഥ ചക്രങ്ങള്‍ അവശേഷിപ്പിച്ച അടയാളങ്ങളുമുണ്ടെന്നാണ് ഇപ്പോഴും വിശ്വസിക്കുന്നത്. ഈ ക്ഷേത്രത്തില്‍ വിഗ്രഹമില്ല. പകരം ഒരു സുവര്‍ണ്ണയന്ത്രം ഭിത്തിക്കുള്ളില്‍ വച്ചിരിക്കുന്നു. ഈ യന്ത്രത്തില്‍ 51 ശ്ലോകങ്ങള്‍ ആലേഖനം ചെയ്തിരിക്കുന്നു.
പൂര്‍ണിമ ദിവസങ്ങളിലെ ഭാദ്രപദി പൂര്‍ണിമ മേളയ്ക്ക് ലക്ഷക്കണക്കിന് ഭക്തജനങ്ങളാണിവിടെയെത്തുന്നത്.
പ്രത്യേക ആകര്‍ഷണങ്ങള്‍
നവരാത്രി ആഘോഷങ്ങള്‍ നടക്കുന്ന ഒമ്പത് ദിനങ്ങളിലും ഗുജറാത്തിലെ കര്‍ഷകര്‍ കുടുംബ സമേതം ഈ ക്ഷേത്ര ദര്‍ശനം നടത്തും. ഉത്സവത്തോട് അനുബന്ധിച്ച് വലിയൊരു മേളയും നടക്കുന്നുണ്ട്. ഭവായ്, ഗാര്‍ബ എന്നീ പരിപാടികളും ഇതോടൊപ്പം നടക്കുന്നു.
എഴുനൂറ് ദേവീസ്തുതികള്‍ അഥവാ ‘സപ്തശതി’ ചൊല്ലുന്നതും ഇവിടുത്തെ പ്രധാന ആചാരമാണ്.
ഭാദ്രപദി പൂര്‍ണിമയ്ക്ക് ഇവിടെ എത്തുന്ന ഭക്തര്‍ രണ്ട് മൈല്‍ പടിഞ്ഞാറുള്ള ഗബ്ബാര്‍ഗഡും സന്ദര്‍ശിക്കും. പ്രകൃതീ ദേവിയെ വന്ദിക്കുന്നതിനായി ഭക്തര്‍ ഈ കുന്നിന് മുകളിലുള്ള ആല്‍മരത്തിന് വലം വയ്ക്കും.
എല്ലാ പൂര്‍ണ്ണിമ, അഷ്ടമി ദിനങ്ങളിലും അംബാജിക്ക് പ്രത്യേക പൂജ ഉണ്ടായിരിക്കും. വാക്കുകള്‍ കൊണ്ട് പറഞ്ഞ് ഫലിപ്പിക്കാനാവാത്ത വിധം ഭക്തി സാന്ദ്രമാണ് ഇവിടുത്തെ അന്തരീക്ഷം.
യാത്ര
അഹമ്മദാബാദില്‍ നിന്ന് 180 കി. മീ. അബു റോഡ് സ്റ്റേഷനില്‍ നിന്ന് 20 കി.മീ. മൌണ്ട് ആബുവില്‍ നിന്ന് 45 കി.മീ. ഡല്‍ഹിയില്‍ നിന്ന് 700 കി. മീ. ഏറ്റവും അടുത്ത റയില്‍‌വെ സ്റ്റേഷന്‍: അബു റോഡ്. അടുത്ത വിമാനത്താവളം: അഹമ്മദാബാദ്.
|
അഭിപ്രായം,നിര്ദ്ദേശം
സുഹൃത്തിന് അയക്കൂ
പേജ് പ്രിന്‍റ്ചെയ്യൂ
