തന്റെ മകനെ ഒരു മതവിശ്വാസത്തിലേക്കും താന്‍ നയിക്കില്ലെന്ന് കേരള ബ്ലാസ്റ്റേഴ്സ് താരം സി കെ വിനീത്. കഴിഞ്ഞ മാസം 23ആം തീയതിയാണ് വിനീത് അച്ഛനായത്. കണ്ണൂരിലെ ധനലക്ഷ്മി ആശുപത്രിയില്‍ വെച്ചായിരുന്നു കുട്ടിയുടെ ജനനം.

‘എന്റെ മകന് ജീവിക്കാന്‍ മതം വേണ്ട. അവന്റെ വിശ്വാസവും വഴിയും അവന് തന്നെ തിരഞ്ഞെടുക്കാം. ഭാവിയില്‍ ഏതെങ്കിലും മതത്തില്‍ വിശ്വസിക്കാമെന്ന് അവന് തോന്നുകയാണെങ്കില്‍ അത് അവന്‍ ചെയ്തോട്ടെ. അവന്റെ ഇഷ്ടത്തിന് വിടുന്നു’ - എന്നായിരുന്നു വിനീതിന്റെ അഭിപ്രായം.

നേരത്തേ കൊച്ചിയില്‍ നടന്ന ക്വിയര്‍ പ്രൈഡ് മാര്‍ച്ചിനും വിനീത് പിന്തുണ നല്‍കിയിരുന്നു. ‘വ്യത്യസ്തരായി ജനിച്ചത് കൊണ്ടോ സമൂഹത്തില്‍ ഭൂരിപക്ഷത്തിന് അപരിചിതമായ പ്രണയങ്ങളില്‍ ഏര്‍പ്പെടുന്നത് കൊണ്ടോ ഒറ്റപ്പെട്ടു പോകുന്നവരും മനുഷ്യരാണ്. സ്വന്തം വ്യത്യസ്തതകളോടെ തന്നെ നമ്മുടെ ഇടയില്‍ അഭിമാനത്തോടെ ജീവിക്കാനും, ജോലി ചെയ്യാനും, നമ്മള്‍ അനുഭവിക്കുന്ന സ്വാതന്ത്ര്യം അതേ അധികാരത്തോടെ അനുഭവിക്കാനും, സ്വന്തം ജീവിതം ആഘോഷിക്കാനും അവര്‍ക്കും അവകാശമുണ്ട്‌. നാളെ നടക്കാന്‍ പോകുന്ന ലൈംഗികസ്വാഭിമാനയാത്രയ്ക്ക് എല്ലാ ആശംസകളും. അവരുടെ സ്വപ്നങ്ങളിലും നിറങ്ങള്‍ നിറയട്ടെ‘ - എന്നായിരുന്നു വിനീതിന്റെ പ്രതികരണം.