ആദ്യദിന കളക്ഷൻ റിപ്പോർട്ടിന്റേയും നിർമാണച്ചിലവിന്റേയും പേരിലാകരുത് ഒരു സിനിമ അറിയപ്പെടേണ്ടതെന്ന് നടൻ പൃഥ്വിരാജ്. ഇത്തരത്തിൽ ഉണ്ടാകുന്ന സാഹചര്യങ്ങൾ തീർത്തും അനാരോഗ്യകരമാണെന്ന് പൃഥ്വി പറയുന്നു. പുതിയ ചിത്രമായ വിമാനത്തിന്റെ വിശേഷങ്ങൾ പങ്കു വെയ്ക്കുകയായിരുന്നു അദ്ദേഹം.

മലയാള സിനിമയുടെ കാൻ‌വാസ് വലുതാകുന്നതിലും തിയേറ്റർ കളക്ഷൻ കൂടുന്നതിലും സന്തോഷമുണ്ടെന്ന് താരം പറയുന്നു. പക്ഷേ ഒരിക്കലും സിനിമ മാർക്കറ്റ് ചെയ്യുന്നത് അതിന്റെ പേരിലാകാൻ പാടില്ലെന്ന നിലപാടാണ് പൃഥ്വിക്കുള്ളത്.

'എന്റെ സിനിമകളെക്കുറിച്ചുള്ള കോടികളുടെ കണക്കുകളെല്ലാം ഞാനും കേൾക്കാറുണ്ട്. അവയിൽ പലതും ശരിയല്ല, എന്റെ സിനിമകൾക്ക് പുറത്തുപറയുന്ന ബജറ്റ് കിട്ടിയിരുന്നെങ്കിൽ എന്ന് ഞാൻ ആഗ്രഹിക്കുന്നു.' - പൃഥ്വി പറയുന്നു.

വി എഫ് എക്സിന് വളരെ പ്രാധാന്യമുള്ള ചിത്രമാണ് വിമാനം. ശാരീരിക വെല്ലുവിളികളുമായി സ്‌കൂൾജീവിതം പാതിയിൽ അവസാനിപ്പിക്കേണ്ടിവന്ന വെങ്കി എന്ന യുവാവ് സ്വന്തം പ്രയത്‌നം കൊണ്ട് ജീവിതാഭിലാഷം നേടുന്ന കഥയാണ് ചിത്രം പറയുന്നത്.